¹ Isihari bijua Kore, Kohati yaabili, ke o tie Lefi buolu yua, wani yeni Datani yeni Abirami, ke bi tie Eliyabi yeni Oni bijaba, Peleti yaabili, ki tie Rubeni puolŋuani, bi den taani bi jaba ke bi ñii bi ciaga. ² Bi den fii, ki yie ki yie Moyiisi po, bani yeni Israyeli yaaba nitianba, bi den tie yudanba kobilie n piimu (250), ke bi bani ba, ke bi tie li nitaanli nni yaaba. ³ Bi den taani ki bua fiini mi yiema Moyiisi yeni Haarɔn po. Bi den yedi, "I ji tieni ke li pendi u bianu! Li nitaanli siiga, yuakuli gagdi ki ŋani O Diedo po, O Diedo ye ti siiga. Li ga ledi i, ke yinba wani fiindi i yula ki ba diedi li nitaanli kuli ii?" ⁴ Moyiisi ń gbadi lanya maama, ke o baa ki labni. ⁵ O den maadi yeni Kore yeni yaaba n taa yeni o, "Saala siŋaagu nni, O Diedo ba waani Yua n paadi yeni o yeni yua n ye yeni o. O ba cedi li nilo ń nagni o kani. Wani obá ba cedi Wan gandi yua ń nagni o kani. ⁶ Yin ba tieni maama n ne, yin taa ti fantantiadi, ⁷ saala, yin tieni u mu yeni tulaale yeni li ŋbli ti niinni, ki nagni O Diedo nintuali. O Doedo ya gandi yua, wani n gagdi ki ŋani opo. Yinba Lefi yaaba, yinba n tieni ke li pendi u bianu." ⁸ Moyiisi go den yedi Kore, "Cengi nni mani, yinba Lefi buolu yaaba puolŋuani: ⁹ U Tienu gandi yi Israyeli buoli kuli siiga, ki nagni yi o kani, ke i tuuni wani O Diedo tuona, li gbandieli nni, ki go tuuni li gbandieli tuona, ki todi li nitaanli kuli o nintuali, lankuli dá ki dagdi yi ii? ¹⁰ O gandi yi ki nagni o kani yinba yeni i kpiiba, Lefi buolu yaaba kuli. Yeni lankuli, i go lingi salga yidma yudandi i! ¹¹ Lanyapo i, ke yinba yeni i nicagli kuli fiini mi yiema O Diedo po. Be yapo i, ke i bulni ki gagi Haarɔn yua fangi O Diedo?" ¹² Moyiisi den yini Datani yeni Abirami, Eliabi bijaba, ama, bi den yedi, "Ti kan cua a kani. ¹³ Li ki tie yualu ka, ke i ñani ti ya diema nni, ke mi naaŋanma yeni ti siadi den puubi, ki cua yeni ti, ki bua kpa ti mi fanpienma nni ne ee? Mɔlane, a ji yedi ke fini n bani ti yikodi, ki baa gobdi ti! ¹⁴ Li ya lankani, a ki gedi yeni ti ya diema nni ke mi naaŋanma yeni ti siadi puubi, a go ki fidi ki teni ti tinfanma biini, i kuani yeni ku daamɔngu tiidi kuani, ke ti faali n yeni. Mɔlane, a ji bua ŋan juani ti yeni mi tofaama ñɔnianu. Ti kancua a kani." ¹⁵ Moyiisi pali den beni boncianla, ke o yedi O Diedo, "Da ga bi paabu padli. N ki ga bá ŋunyendo bi kani, n nan go ki tieni bi siiga nni obakuli biadma." Kore yeni o cagli nni yaaba ń pani ya pani. ¹⁶ Moyiisi den yuandi ki yedi Kore, "Saala, fini yeni a cagli nni yaaba ń den taani O Diedo nintuali, fini, bani yeni Haarɔn. ¹⁷ I siiga, yuakuli ń taa o fantantiagu, ki tieni li ŋubli yeni tulaale o fantantiagu nni. Yuakuli ba nagni O Diedo nintuali yeni o fantantiagu, likuli ba taani fantantiadi kobilie n piimu (250). Fini yeni Haarɔn mo ba nagni yuakuli o fantantiagu." ¹⁸ Lanwani ii, yuakuli den bobni o fantantiagu, ki tieni tulaale li niinni, ki gedi ki sedi u kadkaanu gbndieli bulñɔbu kani yeni Moyiisi yeni Haarɔn. ¹⁹ Kore den taani li nitaanli kuli, ke bi yie Moyiisi yeni Haarɔn po, u kadkaanu gbandieli bulñɔbu kani, ke O Diedo kpiagdi dɔgdi li nitaanli nintuali. ²⁰ Lanwani ii, O Diedo den maadi yeni Moyiisi yeni Haarɔn: ²¹ "Fuadi mani ki ŋa ya nitaanbiadli ne, ke n ba bolini bikuli mɔlane, yenma." ²² Moyiisi yeni Haarɔn den baa ki labni, ki yedi, "U Tienu, fini yua n puuni bi nisaalba kuli mi fuoma yeni li miali, niyendo baba ya tieni tuonbiadi, a pali ji ba biidi bi niba kuli po yo oo?" ²³ O Diedo den jiini Moyiisi, ki yedi, ²⁴ "Maadi yeni li nitaanli, ki yedi ba, 'sani mani ki fuadi ki ŋa Kore, Datani yeni Abirami.'" ²⁵ Lanwani ii, Moyiisi den fii, ki gedi Datani yeni Abirami kani, Israyeli nikpelba den ŋɔdi o. ²⁶ O den maadi yeni li nitaanli, ki yedi, "Yin fuadi, ki fagdi yeni bi nibiadba ne jondi, ki da sii bi bona bá bonyenli, lanyaaka, i ba kpe kelima bi biadma po." ²⁷ Lanwani ii, li nitaanli den yadi ki fagdi yeni Kore, Datini yeni Abirami jondi, i kaani kuli po, ki ŋa ba. Datani, yeni Abirami den ñani ki see bi jondi bulñɔna kani, bani yeni bi denpuoba yeni bi bila yeni bi yaabila kuli. ²⁸ Lanwani ii, Moyiisi den yedi, "Yaali ne n ba tieni, yin bandi ke O Diedo n sɔni nni ke n tiendi ya tuona ne kuli, mii tuuni li tuona n paacelu po ka. ²⁹ Ya niba ne ya kpe bi yenmiali kuuma, nani nilo kuli ń kpenlimaama, lanwani ii, O Diedo ka sɔni nni. ³⁰ Ama O Diedo ya cedi ke ki tinga yaadi ki ñɔbu nani falu yeni, ki nali li naa niba, ke bi jiidi ki kpientinga nni ki dá fo, yeni i, ke i ba bandi ke li niba fali O Diedo ke li kandi." ³¹ Moyiisi ń li maadi li maama ki gbeni ya yognu, ke ki tinga luodi bi taana po. ³² Ki tinga den yaadi ki ñɔbu, ki nali ba, yeni bi diedi nni yaaba yeni ya niba n den ye Kore cagli nni kuli, yeni bi bonpiakaali kuli. ³³ Bani yeni bi diedi nni yaaba kuli den jiidi ki kua ki kpientinga nni, ki da fo. Ki tinga den guani ki mubni bipo, Yeni ke bi den yaadi, ki bodi li nitaanli siiga. ³⁴ Israyeli niba yaaba n den lindi ba kuli ń den gbadi bi yigni, bi den sani ki fagdi. Bi den taani ki yedi, "Hain, tin sani! ki tinga ń da ti nali timo!" ³⁵ U mu den ñani O Diedo kani nani taañigdu yeni, ki pua ki juu, ki buoni niba kobilie n piimu (250) yaaba n den see ki kubi ti fabntantiadi yeni tulaale yeni. ³⁶ O Diedo go den maadi yeni Moyiisi, ki yedi, ³⁷ "Maadi yeni salga yidkaciamo Haarɔn bijua, Eleyasari, ke wan kua u mu nni, ki ñani ti fantantiadi, kelima li tiadi gagdi ki ŋani O Diedo po. Ke gedi ki wuli mi fantama hali fagma. ³⁸ Ke wan taa bi niba yaaba n tieni ti tuonbiadi ki kpe yeni fantantiadi, ki pua pua ki tandi, ki bobni li padbinbindli. Li niba den cua yeni li tiadi, ki puni nni paabu i, lanwani ii, li tiadi gagdi ki ŋani Mini O Diedo po. Li ba tua Israyeli nitaanli kuli po tiadma, ke n ye bi siiga. ³⁹ Salga yidkaciamo, Eleyasari den taa u mu ń den yiini, ki buoni ya niba yeni, ń den kubi ya kumɔndi fantantiadi yeni, ki pua pua ki tandi, ki tieni kudcaba, ki bobni li padbinbindli, ⁴⁰ ke lan tua bontiadkaali Israyeli yaaba kuli po, ke yua n ki tie Haarɔn puolŋuanu, wan da nagni O Diedo kani yeni fantantiagu, ke o ba juu tulaale, O Diedo nintuali, lanyaaka bi ba juodi nani Kore yeni o cagli nni yaaba yeni, nani O Diedo ń bili Moyiisi o ñɔmaama, maama yeni. ⁴¹ Ama lan den fiifaa, Israyeli nitaanli kuli den taani ki yie Moyiisi yeni Haarɔn po, ki bulni. Bi den tua, "Yinba n bua kpa ki gbeni O Diedo nitaanli." ⁴² Li nitaanli ń den taani ki yie Moyiisi yeni Haarɔn po, bi den ŋmagdi bi nunga ki teli u kadkaanu gbandieli i. Ban den la yaali den pia yaalidgu. Ku tawalgu den pibni li gbandieli. O Diedo kpiagdi den dɔgdi, ⁴³ Moyiisi yeni Haarɔn den nagni u kadkaanu gbandieli. ⁴⁴ Lanwani ii, O Diedo den maadi yeni Moyiisi, ki yedi, ⁴⁵ "Fuadi ki ña ki ŋa ya nitaanli ne, min bolni ba yenma." Lanwani ii, Moyiisi yeni Haarɔn den baa ki labni. ⁴⁶ Moyiisi den yedi Haarɔn, "Taa ku fantantiagu, ki tieni li padbinbindli mu ki niinni, ki tieni li ŋubli yeni tulaale, ki sani tonma ki gedi li nitaanli nintuali, ki mia sugli bi tuonbiadi po, kelima O Diedo pabienli fii, ke u yianbiadu cili ki ji kpa bi niba i." ⁴⁷ Lanwani ii, Haarɔn den tieni Moyiisi ń den waani o maama. O den sani ki kua li nitaanli siiga. U yianbiadu den baa, ki ji yadi bi niga siiga i, o den ŋubni li ŋubli, ki mia sugli li nitaanli tuonbiadi po. ⁴⁸ Haarɔn den sedi bi kpienba yeni yaaba n fo siiga nni i; Yeni i, ke li yianbiadu den sedi. ⁴⁹ Li yianbiadu ń den kpaa yaaba den tie niba piiga n tuda na n kobilele (14700), laa taa yeni yaaba n kpe Kore ya janjanma nni. ⁵⁰ Haarɔn den guani Moyiisi kani, u kadkaanu gbandieli bulñɔbu kani, ke u yianbiadu den sedi.