¹ Diidi, O Diedo, u paaciamu kuli daano ba muni Juda diema yeni Jerusalema yaali n tie mi jiema, mi ñima yeni yaali n tie todma kuli; ² Bi kan baa jakɔnda yeni tɔtieba, bi kan ya pia buudi judanba, ki buali salga yidkaaba, jabaaba yeni nikpecinga kan ya ye; ³ tɔtieba judanba, bulcinba yeni tundikaaba kan ya ye, ceglikaaba, tuonsɔnbanda yeni bulgbandi danba kan ya ye. ⁴ "N ba kaani ku nipaangu i ban tua bi gobdikaaba, bi nipaanba n baa gobdi ba. ⁵ Bi niba ba fiini li mabinli bi lieba po, nilo kuli ń nandi o lielo bii o kuantalielo; ki biga ba fii, ki sugi o nikpelo, ku niyuoyuogu ń fii ki pani ki sedi o bulcindaano po. ⁶ O nilo ba cuo o kpiilo ku baadiegu nni, ki yedi o, 'Fini wani pia ya tiayiekaagu n ŋani; tua ti yudaano, ki ya gobdi tinba talginba.' ⁷ Li daali, o ba yigni, ki yedi, 'N kan fidi ki tua i yudaano; mii pia jiema ki buali tiayiekaagu. Da tuni nni mani ya niwulgu ne ya tugli.'" ⁸ Kelima Jerusalema tulbi ki tuudi, Juda diema mo baa o, kelima bi maama yeni bi tuada ki dagdi O Diedo po, bi nua O Diedo kpiagdi yeni mi kafaama. ⁹ Bi nunmu mɔno wangi kasiedi bi tuonbiadi po; bi yaadi ki waani bi tuonbiadi, kaa wuoni nani Sodomi yaaba yeni Sola bipo! kelima, bani n lingi bi fala. ¹⁰ Yedi o niteginka, ke o ba baa ŋalbalga, kelma bi ba di bi tuadŋama bonluana. ¹¹ Sola o nibiado po! O yema baa biagdi ki pugdi i, kelima lani n baa tie o nui tuona ñuadi, ki ba jiidi o yuli po. ¹² N buolu, bonwaala n gobdi yi, ki wangi fala, ke bi puoba mo die yi. N buolu, yaaba n gobdi yi yeni, tulni yi, ki bua yin tudi u sanu. ¹³ O Diedo fii li bujiali po; o ba jia bi gobdikaaba ti buudi. ¹⁴ O Diedo bua jia o buolu nikpelba yeni bi yudanba ti buudi: "Yinba n biidi ki daamɔngu tiidi kuanu; a luoda tiafagkaadi ye i diedi nni. ¹⁵ Be n cedi ke i ŋmaadi ki madi n buolu niba, ki wangi a luoda fala aa?" Ne tie O Diedo, u paaciamu kuli daano ya ñɔmaama i. ¹⁶ O Diedo yedi ya maama ne, nani Siyɔn jafanŋanba pia ti japaadi, bi cuoni ki yaa bi yula, ki dabni bi nuni, bi cuoni yenma yenma, ki cedi ke bi taabiana mɔa. ¹⁷ Lanya po, O Diedo ba cedi li ŋmaali ń cuo Siyɔn jafanba, bi yula ń pidi, wan yiedi ki seni ba mubili. ¹⁸ Li daali, O Diedo ba dadi ki ñani bisiaba jafantiadi yeni bi badlaani ¹⁹ Bi ba ñani bi tutuuda, bi nuubiamu yeni bi yucaba; ²⁰ O ba ñani ti finfinjuadi, i laani, ti gbanñagditi, tulaale kɔnkɔna yeni a sigda yeni a ñɔgtila kuli. ²¹ Bi ba ñani ya biana n tuu bi miana nni; ²² bi badu liadfagrdi, bi cabibugkaana, bi yucaba yeni bi ligibɔgmu kuli; ²³ ban kubi ya mandiidmu bi nui nni, bi ninfiancaba, yeni ban maandi ya caba bi buacaba po yeni. ²⁴ Li bonbedinli n ba ga tulaale nuulmanu; u baabu n ba ga ku gbanñagdigu ya kaanu; li yupidli bonminminli n ba ga u yupianŋamu ya kaanu; li pabɔnli tiadi n ba ga ti tiakpiagdi ya kaanu; i fee mo n ba ga u ŋamu mo ya kaanu. Jerusalema kpepuona. ²⁵ ki jugsiega n ba kpa i jaba, bu tɔbu mo ń biani i jakɔda. ²⁶ Li bubuuli yeni i fanfabni n ba loli Jerusalema bulñɔna kani; O baa ye li pabɔnli nni, ki kaa o baba.