¹ Waato kaŋ labaaro wo to bonkooney kaŋ yaŋ go Urdun daaranta ga, noodin tondey laabeyra, da gorey laabey ra, teeku beero jabey kulu ga , kala a ma koy Liban jara ga, ngey kaŋ yaŋ ti Hittancey, Amorancey, Kanaanancey, Perizancey, Hibancey, da Yebusancey. ² kala i margu ga te me fo, zama ngey ma Yasuwa nda Israyla izey wongu. ³ Gabeyon borey, kaŋ i maa mate kaŋ Yasuwa te Yeriko da Ayi borey se, ⁴ i na ngey hiila dabari te, ka fonda sambu sanda diyaw-yaŋ, i kabay ngey bande hindoonayyaŋ, saku zeeno yaŋ k' i dake farkayey boŋ, da duvan humbur zeenoyaŋ kan yan i taa. ⁵ I daŋ ngey cey ga taamu zeeno yaŋ kaŋ i taa. I na bankarey zeeno yaŋ daŋ ngey gaa, buurey kaŋ go i se mo muule ga koogu. ⁶ koy Yasuwa kaa ga gar nongo kaŋ wangarey margu ga goro Jilgal, i ne a se nga nda Israyla borey kulu: "iri fun laabu kaŋ ga mooru, sohŏ kala araŋ ma yaada ka alkawali te nda iri. ⁷ Israyla borey mo tu Hibancey wo se ka ne: "A ga hin ga te araŋ go iri game ra, mate no iri gate ga alkawali sambu nda araŋ?". ⁸ I ne Yasuwa se: "iri ya ni bannyayaŋ no". Yasuwa ne i se: "araŋ ya may yaŋ no man no araŋ fun?". ⁹ I tu a se: "ni tamey fun laabu kaŋ ga mooru, Rabbi ni Irkoyo maa sabbay se. zama i na sanni te iri se, da hay kulu kaŋ a te Misira ra. ¹⁰ Da mo mate kaŋ cine a te Amorancey bonkooni hinka kaŋ yaŋ go Urdun daaranta, Hesbon bonkoono Sihon, da Basan bonkoono Og, kaŋ go Astarot". ¹¹ Iri dottijey nda iri kwaara borey mo ne iri se: wa sambu hindoonayyaŋ araŋ naaruyaŋo se ga koy k' i kubay araŋ ma ne i se: "iri ya araŋ bannyayaŋ no , sohô araŋ ma alkawali sambu iri se. ¹² Wa guna, iri buurey , idungo yaŋ no igo waato kaŋ iri n' i sambu hindoonay iri furey ra, hanno kaŋ hane iri tun, a maa i mule , ka koogu. ¹³ Humburey wo kaŋ iri toonandi nda duwan itajiyaŋ no sohô ngey ne i tooru. I bankaaray da iri taamey zeenu ga patti, fonda mora se. ¹⁴ Israyla izey binde kaa i wone hindoonayey ga, amma i mana saaware Rabbi ga. ¹⁵ Yasuwa mo ze i se kaŋ i ga goro bani a na alkawali sambu i se kaŋ ngey g' i nan nda fundi , jama jine funey mo ze i se. ¹⁶ Alkawalo wo sambu yaŋ banda jirbi hinza kal Israyla izey maa kaŋ borey wo ngey gorokasinyaŋ no kaŋ go da gorey i game ra. ¹⁷ Zama Israyla izey dira ka koy ka to i kwaarey do jiribi hinzanta hane. I kwaarey ga ti: Jibeyon, Kefira, Beyerot, da Ciriyat-Yeyarim. ¹⁸ I mana 'i kar, zama, jama jine-funey jin ka zee i se nda Rabbi, Israyla Irkoyo, kaŋ ngey g'i nan nda fundi. Amna jama kulu go ga jine borey jance. ¹⁹ Jine-funey mo kulu saba jama se ka ne : "iri ze i se da Rabbi, Israyla Irkoyo, sohô binde iri si hin ga lamba i ga. ²⁰ Wa guna, mate kaŋ iri ga hin ka te i se ne ya: "iri g'i nan da ngey fundey zama iri ma si Rabbi futta candi iri boŋ, alkawalo kaŋ iri sambu i se din sabe se. ²¹ I ma funa, jine-funey se. Amma i n' i te tuuru-beerikoyaŋ da hari-gurkoyaŋ jama se sanda mate kaŋ cine i jine-funey na ci nda. ²² Yasuwa ni ce ka ne i se: i fo se araŋ n' iri zamba, ka ne :"ir ga mooru araŋ gumo, wiza iri game ra no araŋ go nda gorey? ²³ sohô araŋ ciya laali-hariyaŋ, araŋ si wa banyayaŋtaray mo, tuuri beeriyaŋ, da hari guruyaŋ, ay Irkoyo fuwo se". ²⁴ I tu Yasuwa se ka ne: "i na iri, ni bannyey kabarandi no nda hini sanney kaŋ Rabbi, ni Irkoyo, ci nga tamo Musa se ga ne, nga na laabo kulu no araŋ se, araŋ ma laabey wo borey kulu halaci, woodin no nan iri mo iri humburu gumo iri fundey sabey se,wodin se no iri mo na wone te. ²⁵ Iri neya sohô araŋ kambeyra, ma te iri se mate kaŋ ni di ga boori nda mate kaŋ ga saba ni diyaŋ ga. ²⁶ Yasuwa te i se mate i na ci nda, a ni komandi Israyla izey kambe ra , i m' i si wi ngey mo mana i wi . ²⁷ Amma za hane din hanne no , a ni daŋ tuuri beerikoyaŋ da hari guruyaŋ jama se nda mo Rabbi feema se nango kulu kaŋ a baa ra. Woodin ra no i go hal hunkuna.