¹ Í cāgbǝ kǝ míxɔ ǝ̀dɔ ŋna í kǝ ìlǝ sigbǝ míxɔ amǝnúvə́və́á, ǝ̀jì ŋɖǝ le míán xo ò. ² Càgbǝ ŋnatɔ, mígbə́ ŋkpɛn mɔ̃nwó kídə́ ǝnyɔn wawrawó. Mí ŋlǝ nɔn agbǝ lǝ ŋunú nyányán mǝ ò, í míŋ trɔ̃ Mawu nyɔan ò. Vɔ̃à lǝ àdòdo núnúma án, mí cɔ̃ núán ɖákíwó nán amǝwó jimǝnyɔn nyányán lǝ Mawu yá ŋkúví mǝ. ³ Vɔ̃à náwó cɔ̃n míán nyɔn nyɔ̃ŋgbian jíá, wó cɔ̃nji ɖǝ̀ɖǝ nə́ amǝ kǝlǝ kúwóí. ⁴ Lǝ wótɔmǝán, xíxə́ámǝ yə́ Mawu cɔ̃ɔnú cɔ̃n amǝ maxɔse wó gbɔngbɔn jí. Ǝ̀vɔɛntɔá, wó ŋ' táŋ' kpɔ̃ ǝnyɔn nyɔ̃ŋgbian yə́ ŋúntíkɔkɔ kǝ nyí Mawu yá nɔnɔnmǝ an ò. ⁵ Í míŋlǝ nú Mawu nyɔn ná míán ɖákíwó á, vɔ̃à Kristo Yesu sigbǝ Àxótɔ̃, í míán ŋtáwó sigbǝ míán dɔcɔ̃víó nə́ Yesu yə́ rɔnrɔn. ⁶ Ɖó Mawu ɖə́kɛn í núbə́: «kanŋɖé lává kɔ lǝ zùubruwó mǝ,» í ə́kɔ lǝ míán jíwó ma, nə́ àna kɔ̃kɔ̃ Mawu yǝŋtíkɔkɔ yǝ ŋùnú nyányán, lǝ Yesu ŋkɔ. ⁷ Vɔ̃à míwɔ núxɔ̃àfi ina ɖɛ lǝ ǝ̀cugbán wó mǝ, nə́ yə́mǝ nákɔ bə́ ŋúnsɛn kǝlǝ gánŋgán də́jíá nyí Mawu tɔ vɔ̃à ŋ'nyí míán tɔ ò. ⁸ Ranmǝ kúmílǝ ǝmɔ̃nsíamɔ̃n nu, vɔ̃à míŋ cáká ò.Ǝ́dáya nə́mí vɔ̃ mɔ̃nkpɔ̃kpɔ̃ kídə́ jíɖǝ̀ làmàxò o . ⁹ Wó tí míán yomǝ nàna wo ŋ'gbə́míɖɛ ò. Wó zín mí də́ anyígbán vɔ̃à wóŋ crɔ̃n míó. ¹⁰ Mí xɔnǝ Yesu yə́ kú gàsíágàmǝ̀ dǝ míán ranmǝ, kə́ŋ gbɔxó Yesu yə́gbǝ nán wɔ̃dɔ lǝ míán ranmǝ. ¹¹ Míán wó kǝ lǝ àgbǝ̀ wó á, wá cɔ̃mí nə́ ǝ̀kú gàsíágàmǝ̀ də́ Yesu yə́ rɔnrɔn ta gbɔ̃xó nə́ Yesu yə́ gbǝ ná zə́ lǝ gótòran wó mǝ. ¹² Càgbǝ inan tɔ, ǝ̀kú lǝ dɔ̃jí lǝ míán mǝ, vɔ̃à lǝ dɔ̃jí lǝ wó mǝ. ¹³ Vɔ̃à míwɔ xɔ̃sǝ̀ yə́ gbɔngbɔn ɖǝ̀ká rɔkpa ɖɛ sigbǝ wó ŋrɔɛn ɖɛ bə́ :« ŋxɔɛsǝ, í nǝnə́ kə́ ŋ lǝ xonu nǝ̀.» Mí xɔɛsǝ cá, í nǝnə́ kə́ milǝ xonu nǝ̀. ¹⁴ Mí nyán bə́ amǝ kǝ ƒɔ̃n Àxótɔ̃ Yesu a á vá ƒɔ̃n míán wó cá kídə́ Yesu. Mí nyán bə́ á kprɔ mí kídə́ mí yi ɖǝ̀ǝkia gblɔ. ¹⁵ Núsíanú lɛ càgbǝ míán tɔ kə́ŋ' gbɔ̃xó, sigbǝ amǝnúvə́və́ á ɖíɖí na amǝ sùgbɔ̃ á, àkpə́də́də́ vɔsáwó á lǝ ji də́jí lǝ Mawu yə́ ŋtíkɔkɔ mǝ. ¹⁶ Kǝí lǝǝnǝán, ǝ̀jì ŋ dó á ɖǝ lǝ̀ xo nə́mí ó. Nə́ í nyìbə́ lǝ gòtòramǝ cá wó crɔ̃n míán, lǝ ə́mǝ- ə́mǝ án, wó trɔ̃ mí ŋkǝkǝ yi ŋkǝkǝ jí. ¹⁷ Ɖó ranmǝ kúkú hɔɛɖə́ká gà ɖǝ̀ wómǝ tɔa jranǝ mí dó lǝ ŋtíkɔkɔ mavɔ yə́ kpɛnkpɛn mǝ kǝ xòta nə́ ɖǝsíàɖǝ mǝ . ¹⁸ Ɖó míŋ' lǝ kpɔ̃ ǝnúkǝ zə́ ɖɛá wó ò, vɔ̃à mí lǝ kpɔ̃ ǝnú mazémazé ó. Ǝnú kǝ zénɔ̃n wó ŋ'nɛnɔn diŋdi ó í ǝnú kǝ ŋ'zénɔ̃n oá nɛnɛn ɖɛ yi ma.