ǝta 2

1 Cagbǝ̀ ìnàtɔ̀ íŋ̀ ɖóǝ̀ bǝ́ nyǝ̀ ŋ́ ná gbǝ̀ trɔ́vá mìàn gbɔ́ lǝ́ vǝvǝ́ sǝ̀sǝ̀wó nɔ̀nɔ̀n mǝ̀ o. 2 Nɛ́ i nyibǝ́ ŋ̀ dáyà nɛ́mì, mɛ̀ɛ́n lá dóogàn ŋ̀, kǝ́ ámǝ̀ kǝ̀ ŋ̀ dákpà ŋú án ía? 3 ŋ̀ ŋrɔ̀nú sìgbǝ̀ ŋ̀ wɔ̀ɛ̀ cagbǝ̀ nǝ̀ ŋ̀ trɔ́ vá mìàgbɔ́, mì ŋ́ káà xɔ akpà tó àmǝ̀ kǝ̀ ɖó lá nàŋ̀ ayǝtítɛ́ ji o. ŋ̀ kádǝ́ mìàn jí bǝ́ tiŋ́ yǝ̀títɛ́ lǝ̀ sìgbǝ̀ mìàtɔ̀. 4 Ɖó ŋ̀ ŋrɔ̀n nú kídǝ́ rànmǝ̀ kúkú gánŋ́gán, kídǝ́ ǝji gbàngbàn kídǝ́ aɖaci. Nyǝ̀ ŋ́ jí bǝ́ má dáyá nǝ́ mì o. Tóvo nǝ̀ inà ǹ jí bǝ́ mìàn nyá ganŋgán mǝ̀ kǝ̀ lǝ̀ rɔnrɔn kǝ̀ ŋɖo nǝ̀ míán si. 5 Nǝ́ àmǝ̀ɖǝ́ dáyà ǝnǝ́ amǝ án, ŋ̀wɛ̀ɛ̀ nǝ́ nyǝ̀ ɖékɛ́n o, vɔa nǝ̀ mí ná wɔ̀ ŋ́ɖǝ́ tómǝ̀dí àá, mìàn wó séé tɔ̀í. 6 Àmǝ̀ ŋ̀nàn yǝ́ to dɔ̀ndɔ̀n lǝ̀ gbɔ̀sùsù mǝ̀ ǝ́ sún. 7 Có ǝ́gbà ji, sǝwú ǝtó dɔ̀ndɔ̀n án, mìɖó á sǝ́ kǝ̀ǝ̀ í dóogɛ̀ɛ̀n. Mì wɛ̀ɛ̀nǝ́ cagbǝ nǝ́ xòmǝ̀fíɛ́n ŋ́káa wìì o. 8 Ifìà, ŋ̀ lǝ̀ dóogàn mì bǝ̀ mìàn ɖǝ̀ rɔnrɔn ̀blìbò díisá nɛ̀n. 9 Ìlá í ná í ŋ̀ lǝ̀ ŋrɔ̀nú, nǝ́ má dómìkpɔ́ í nǝ̀ mán nyán nǝ́ mì kpɔ́ nǝ́ àmǝ̀si lǝ̀ núɖǝsíaɖǝ̀ mǝ̀. 10 Nǝ́ mìsǝ́ kǝ̀ àmǝ̀ɖǝ́ á, nyɛ̀ncá maán sǝ́kǝ̀ǝ̀. Ǝ̀nú kǝ̀ ŋ̀sǝ́ kǝ̀ á (nǝ́ ŋ̀cɔ́ ǝ̀núɖǝ́ sǝ́ kǝ̀á), ǝ́kpɔ́ cɔcɔ́kǝ̀ cagbǝ̀ mìàntɔ̀ Kristo lǝ̀ kɔ̀. 11 Cagbǝ̀ nǝ́ Sátana ŋ́ káa ɖù miàn ji o, ɖóó mí ŋ́ gbǝ̀ dán yǝ́ tòtòmǝ̀ wó o. 12 Àxotɔ́á hùn agbò ɖɛ́ŋ̀ kǝ̀ ŋ̀ vá Tròás dùà mǝ̀ bǝ́ mán kaka Kristo yǝ́ nyɔ̀n nyɔŋ́gbìn án. 13 Í cáá nyǝ̀ŋ́ ɖǝ̀jí lǝ̀ gbɔngbɔn mǝ̀ o ǝ́nú kǝ̀ jɔ̀á nyǝ̀ ŋ́ kpɔ́ tìŋ́ nɔ̀nví Títo lǝ́ŋ́nà o. Ga ŋ̀nà mǝ̀ án,ŋ̀có gbǝ̀ wó ɖɛ́ í trɔ́yì Masǝdónia. 14 Vɔa wá cɔ́ ŋ́tíkɔ̀kɔ̀ nǝ́ Mawu, kǝ̀ tó Yesu ji kprɔ̀nǝ̀ mí tɛgbɛɛ lǝ jìɖùɖù mǝ̀. Tó míán jí á, ǝ́kàkànǝ̀ yǝ́ ŋ̀ùnúnyányán yǝ́ hɔ́nhɔ́n lǝ̀ afísíafi. 15 Ɖó, mí nyí Yesu yǝ́ hɔnɔ́n nyɔŋ̀gbìn nǝ́ Mawu lǝ̀ àmǝ̀ kǝ̀ kpɔ́ xɔxɔwò mǝ̀ ícó àmǝ̀ kǝ̀ lǝ̀ crɔ́n wómǝ̀. 16 Nǝ́ àmǝ̀kǝ̀ lǝ̀ crɔ́n wó á, ǝ́nyín ǝkú yǝ́ hɔ́nhɔ́n nǝ́ ǝkú. Nǝ́ àmǝ̀ kǝ̀ wóá kpɔ́ xɔxɔ wo á, ǝ́nyí agbǝ yǝ́ hɔ́nhɔ́n nǝ́ agbǝ. Mɛ̀én í jǝ̀ nǝ̀ nǝ̀nǝ̀ núwó? 17 Ɖó mí ŋ́ nyí àmǝ̀kǝ̀ wó sànà Mawu nyɔ̀ cagbǝ̀ ǝgòmǝ̀ kpɔ́kpɔ́ tɔ̀. Tóvo nǝ̀ ŋ̀ nà án, kídǝ̀ ǝ̀ŋùnɖɔ̀ɖɔ̀ ŋ́tá-ŋ́tá, nú xònǝ̀nù lǝ̀ Kristo mǝ̀ sigbǝ̀ Mawu yǝ́ mǝ̀dɔ́dɔ́ lǝ̀ yǝ́ ŋ̀kúví mǝ̀.