¹ Yehowa xonuxo nɛ Mɔse, yinu be: ² Kplɔ Aarɔn kudo yo viwo, wo awuwo, ami sisi, eto tsinɛ wosɔɖenɔn nuvuĩ ɖoɖa, agbo amɛveawo kudo kpɔnɔn mahuan mahuan yo djafiwo; ³ yi nayɔ hamɛa kpata ɖo Yehowa yo agbadɔa nu. ⁴ Mɔse wɔ nutsinɛ Yehowa ɖo nii; yi amɛha bɔɖo Yehowa yo agbadɔa nu. ⁵ Mɔse tonɛ amɛha be: Enutsinɛ Yehowa ɖo be woawɔ ke. ⁶ Mɔse nabe Aarɔn kudo yo viwo vagbɔ, yi yile esi nɔnwo. ⁷ Esɔ awutawuiɛ vlaya donɛ Aarɔn, yi yibla bɛlɛntsi nii, edo djiwuvlaya nii, yi yisɔ kɔmɛwu daɖodji nii, yo ŋgbodomɛ lɔ, esɔkɔmɛwua yo ka bladji nii. ⁸ Esɔ akɔtaɖonua ɖodji, yi yisɔ Uriŋ kudo thimim sɔdo akɔtaɖonua dji. ⁹ Yi yisɔ atabladjinua bla eta nii, yi yisɔ sikaŋgoblanu kɔkɔɛ sɔɖo tablanua ŋtsi le ŋkɔ, sigbebe lesti Yehowa ɖoe nɛ Mɔse nɛnɛ. ¹⁰ Mɔse sɔ amisisia, yi yisi ami nɛ agbadɔa kudo enutsiwo kpata lexɔn, yi yikɔwo ŋtsi. ¹¹ Ewɔɛ zeandrɛ ɖo vɔsakpea ŋtsi, yi yisi ami nɛ avɔsakpea kudo enuawo, kudo esilezea kudo yo azɔnlɔ, bɛnɛ woakɔ. ¹² Ekɔ amisisia ɖo eta nɛ Aarɔn yi yisi ami nii, benɛ yakɔ ŋtsi. ¹³ Mɔse gbekplɔ Aarɔn yo viwo tsan va; edo awutawui vlawa nɔnwo, yi yibla alĩndji nɔnwo, yi yisɔ etadjiblanua bla eta nɔnwo sigbebe letsi Yehowa ɖoe nɛ Mɔse nɛnɛ. ¹⁴ Yi yina wosɔ nuvuĩnɖeɖeɖa yo agboa va, yi Aarɔn kudo eviawo sɔ alɔwo daɖo etadji nɛ nuvuĩnɖeɖeɖa yo agboa dji. ¹⁵ Mɔse wuii, yi yixɔ yo hunlɔ, yi yisɔ yo alɔ do ehuan mɛ siɖo avɔsakpea yo sotsiawo ŋtsi trɔdo, yi yikɔ avɔsakpea ŋtsi; esɔ ehuan kɔɖo avɔsakpea yo afɔnu, yi yikɔ ŋtsi benɛ yaɖe nuvuĩn ɖa. ¹⁶ Esɔ amia kpata tsinɛ tsɔn adɔmɛnuawo dji, ago ganlɔ, kudo ayiku eveawo kudo wo amiawo, yi yitɔzowo le avɔsakpea dji. ¹⁷ Vɔlɔ etɔzo agboa yo agbazeɛ kudo emiawo le asara godo, sigbebe alesti Yehowa ɖoi nii nɛnɛ. ¹⁸ Esɔ agbo yo numɛmɛvɔsa va, yi Aarɔn kudo eviawo sɔ alɔ daɖo etadji nii. ¹⁹ Mɔse wuii, yi yisɔ ehuan hlĩndɔ avɔsakpea ŋtsi trɔdo. ²⁰ Edja agboa kpolivi kpolivi, yi yitɔzo eta, etsiwo yidja lɔ kudo amia. ²¹ Eklɔ adɔmɛnuawo kudo atawo, yi yitɔzo agboa kpata le avɔsakpea dji: Eyɛnyi numɛmɛvɔsa, tsinɛ wotɔzo, yi huĩnɔn lilili le Yehowa yo ŋkumɛ, sigbebe letsi Yehowa ɖoi nɛ Mɔse nɛnɛ. ²² Esɔ agboa tsinɛnyi amɛɖoɖo yo agbo sɔva avɔsakpea gbɔ, yi Aarɔn kudo eviawo sɔ alɔwo daɖo etadji nɛ agboa lɔ. ²³ Mose wuii, sɔ yo huan ɖe, sɔsisiɖo Aarɔn yo ɖusi toa ŋtsi, yo ɖusi dĩnglĩnfĩnsu dji kudo yo ɖusi afɔvisu dji. ²⁴ Enan Aarɔn yo viwo va, yi yiwɔ letsi yiwɔnɛ woatɔ pɛpɛpɛ, yi yisɔ ehuan hlĩnɖo avɔsakpea dji trɔdo. ²⁵ Esɔ amia, asikea, ami tsinɛ tsɔn adɔmɛnuawo dji, ago ganlɔ, ayiku eveawo kudo yo amiwo, kudo ɖusi bɔa; ²⁶ egbesɔ akpɔnɔn mahuan mahuan le adjafia mɛ, sɔdaɖo Yehowa yo ŋkumɛ, akpɔnɔn mahuan mahuan ɖeka, akpɔnɔn amitɔ kudo akaklɛa, yi yisɔwo daɖo amiawo kudo ɖusi bɔa dji. ²⁷ Esɔ enuyɛwo kpata daɖo alɔmɛ nɛ Aarɔn kudo eviawo yo alɔmɛ, yi yihunhun wo le Yehowa yo ŋkumɛ. ²⁸ Yi Mɔse ɖewo djole wo alɔmɛ, yi yitɔzo wo le avɔsakpea dji, le numɛmɛvɔsa tamɛ: eyɛnyi amɛɖoɖovɔsa, enyi ezovɔsa, tsinɛ huĩnɔn gbligbligbli le Yehowa yo ŋkumɛ. ²⁹ Mɔse sɔ amɛɖoɖo yo agbo yo akɔta, yi hunhuĩn le Yehowa yo ŋkumɛ: eyɛnyi Mɔse tɔ, sigbebe letsi Yehowa ɖoi nɛ Mɔse nɛnɛ. ³⁰ Mɔse sɔ amisisia kudo ehunlɔ tsine le avɔsakpea dji; ehlĩn ɖo Aarɔn kudo eviawo dji kudo wo awuwo; yi yikɔ Aarɔn kudo eviawo, wo awuwo ŋtsi. ³¹ Mɔse tonɛ Aarɔn kudo eviawo be: Mitɔ agbazea le Mawu yo agbadɔa nu; xɔnyi milaɖuii le nɛ, kudo amɛɖoɖo yo akpɔnɔnlɔ tsinɛ le adjafia mɛ, sigbebe letsi ŋɖoi, yi ŋnu be: Aarɔn kudo eviawo yila ɖunii nɛnɛ. ³² Milatɔzo agbaze kudo akpɔnɔn kpɛtɛa . ³³ Le ŋkeke amaŋdrɛ domɛa, miŋda djole Mawu yo agbadɔa yo ŋkɔ, kakavana gbetsigbe yi mia amɛɖoɖo yo ŋkekea lavɔ O; ɖo ŋkeke anŋdrɛ yi wolasɔ ɖo mi. ³⁴ Enutsinɛ djɔ egbɛlɔ, Yehowa ɖoi benɛ yanyi avuŋlele nɛ mi. ³⁵ Milanɔn Mawu yo agbadɔa nu ŋkeke anŋdrɛ, ezan kudo kede, yi milawɔ ɖo Yehowa yo sedodowo dji, benɛ miŋgbe ku O; ɖo enutsinɛ woɖo nuŋ nɛ. ³⁶ Aarɔn kudo eviawo wɔɖo enutsiwo kpata Yehowa ɖo nɛ Mɔse dji.