¹ Yehowa xonuxo nɛ Mɔse, yinu be: ² Ɖonɛ Izraɛlviwo be wonɛsɔ zomi nuiɖe sɔva, benɛ woatɛnŋ nan be kanligbɛnwo nɛnɔn bibiɔ ɖaaa. ³ Aarɔn ladjrɛɖo le Mawu yo agbadɔa mɛ, le xɔmɛsovɔ, tsinɛ tu nublablaɖaka yo ŋkɔ, benɛ yanɔn bibiiɔ ɖaaa so woetrɔgbɔ vasɛnɖo fɔnfɔmɛ le Yehowa ŋkumɛ. Eyɛlanyi ese tɛgbɛtɛgbɛ nɛ mia djidjimɛwo. ⁴ Eladjra kanligbɛnwo ɖo le sika kanligbɛntsia dji, benɛ yanɔn bibiiɔ ɖaaa le Yehowa yo ŋkumɛ. ⁵ Wolasɔ ewɔmɛmɛ sɔwɔ akpɔnɔn woeve; ewɔ efan yo mămămɛ tsinɛ womăɖo texoe ewo yilawɔ kpɔnɔn ɖeka. ⁶ Wolaɖowo ɖo eka eve dji, adin le kaɖeka nu, le sikakplɔnlɔ dji le Yehowa yo ŋkumɛ. ⁷ Wolada azizɔdonu ɖo agbaka ɖeka dji, yi yilanɔn akpɔnɔn dji sigbebe ŋkuɖodjinu nɛnɛ, sigbebe numɛmɛvɔsa tsinɔn ezo nu le Yehowa yo ŋkumɛ. ⁸ Sabbati ɖekpekpe gbe lɔ, woladjra akpɔnɔn tsɛwo ɖo le Yehowa yo ŋkumɛ sɔyiɖaaa: Eyɛnyi nublabla tɛgbɛ tsinɛ Izraɛlviwo lawɔnɔn . ⁹ Wolanyi Aarɔn kudo eviɛwo tɔ, yi wolaɖuii le texoe kɔkɔɛ; ɖo elanyi enu kɔkɔɛ yo nu kɔkɔɛ , ezovɔsa ɖeka le Yehowa yo ŋkumɛ. Eyɛnyi ese tɛgbɛtɛgbɛ. ¹⁰ Izraɛlvi nyɔnu yo vi nusuvi kudo Egipti nusu, wova Izraɛlviwo dodomɛ, yile adjre wɔɔ kudo Izraɛlvi nusu. ¹¹ Nyɔnua yo vi Izraɛlvia nu busunyan yi xofĩndo Mawu yo ŋkɔ. Wokplɔɛ sɔva Mose gbɔ. Enɔnlɔkɔ yo ŋkɔ nyi Shelomiti, Dibri yo vi nyɔnuvi, tsiso Dan yo kɔta mɛ. ¹² Wosɔɛ do gakpamɛ, kakavanan gatsimɛ yi Mɔse nu enyɔn tsine Yehowa ɖoa. ¹³ Yehowa xonuxo nɛ Mɔse, yinu be: ¹⁴ Ɖe amɛtsinɛ nu busunyɔn to; ametsiwo kpata se enyɔn tsinɛ yinua lasɔ alɔwo daɖo tamɛ nii, yi asara kpata layakpee . ¹⁵ Wolatonɛ Izraɛlviwo be: Amɛsiamɛ tsinɛ laxofĩndo yo Mawu , ŋtɔ ladro yo nuvuin yo gban. ¹⁶ Wola xokpe amɛtsinɛ lanu busunyɔn ɖo Yehowa yo ŋkɔ dji: asa kpata laya kpe nii. Nɛgbenyi amɛdjro alo Izraɛlvi lɔ, elaku , ɖo enu busunyɔn ɖo Mawu yo ŋkɔ ŋtsi. ¹⁷ Nɛ amɛaɖe xo amɛ yi yiku lɔ, wola wuii. ¹⁸ Nɛ amɛaɖe xo elan yi yiku lɔ, elasɔ elan bu nan ɖo ye texoe: agbe ɖo agbe texoe. ¹⁹ Nɛ amɛɖe do abi nɔnviɛ lɔ, wolawɔ nutsinɛ yiwɔ pɛpɛpɛ nii: ²⁰ Ŋɛnŋɛn ɖo ŋɛnŋɛn texoe, ŋkuvi ɖo ŋkuvi texoe, aɖu ɖo aɖu texoe; wolawɔ nutsinɛ yiwɔnɛ nɔnviɛ pɛpɛpɛ. ²¹ Amɛtsinɛ lawu elan ɖea laɖo yo texoe, ganke wolawu ametsinɛ wu amɛ. ²² Amɛdjro kudo duamɛvi laɖo ese ɖekaŋmɛ; ɖo enyɛ yinyi Yehowa , mia Mawu. ²³ Mose xonuxo nɛ Izraɛlviwo; woɖe busunyɔnutɔa to, yi woxo ekpee. Izraɛlviwo wɔɖo ɖoɖo tsinɛ Yehowa ɖo nɛ Mɔse dji.