¹ Agbetɔ nyɔnu tɔdjidji yo agbe le kpuixoe nɛ kpɔtɔle efukɔwo. ² Etonɔn sigbe flawa nɛnɛ, esinɔn abu sigbe vɔnvɔnli nɛnɛ. ³ Yi yeŋsi woke ŋkuviɖo, yi wo kplɔm va kodjoɖoxoea? ⁴ Lede amɛmakɔmakɔ la tɛnŋ ɖe amɛkɔkɔɛ toa? Ɖekapɛ teteo? ⁵ Nɛn wodo yo ŋkekewo, nɛn wohlɛn wo wletsiwo, yi wodo lixo nɔn yo toxoe afitsi nakpɔ ta nɔn le. ⁶ Kexɔn a, tasi nɛyavo, nɛyakpɔ djidjɔɛ sigbe letsi gbantesɔtɔ gbɔnɔn djidjɔɛ ɖo yo ŋkeke ŋtsi nɛnɛ. ⁷ Mɔkpɔkpɔ le nɔn atsi yi nɔn wo suelɔ, egbe trɔminɔ, trɔzɛnɔnvi. ⁸ Nɛn yo ke doxo le anygbanmɛ, mɛ yo dodomɛ ku le ayamɛ a. ⁹ Esi yo djadja nanɔnbe, egbedje, yi tonɔn atsilɔ mumu yeye. ¹⁰ Vɔnɛ ŋsu kulɔ, ebunɔn yo ŋtsɛn, yi nɛ ŋsu ku ɖe, fibe yi bele? ¹¹ Tɔgbame siwo djonɔn, etɔ srasrawo xunɔn yi emefunɔn. ¹² Nɛnɛke agbetɔ mlɔn anyilɔ, ŋdegbefɔnnɔn, letsi ŋkeke kuɖo djipo le lɔ, ŋdenyannyi o, yi woŋ deyɔnyi le alɔnmɛ o. ¹³ Oh! Nɛwo wlaŋ ɖo kuodi, yi woleŋ sɔnu tsɔndjinyɛ kaka vasɛnɖo gatsimɛ dɔmeze tɔwo nu la vayi, naɖo game na nɛ naɖo ŋkuvidjime le yoŋgbedeme. ¹⁴ Nɛ ŋsu ku ɖe, egbe gbɔnagbea? Naɖo djidjopo le ayaɖuɖu game tsi nyɛ wo kpata, kaka vana gtsime agbe tsinyɛ lavatrɔ. ¹⁵ Yɔŋ, fifiɛ ko nɛ matrɔnɔn, nɛ alɔnu ɖɔwawa tɔwo wo le djrodjrowo. ¹⁶ Vɔ ɛgbɛa wole avɔɖeɖe tsinyɛ wo hlɛnwɔ, yi ŋkuvi le nuvɔn tsinyɛwo djinɔn. ¹⁷ Wosɔ djidada tsinyɛ donume trenunyi goŋgoŋ, yi wogbele ŋkuviɖoɔ avodada tsinyɛ dji. ¹⁸ Nɛ eto ŋɛn djime lɔ, etunɔn wɔ, yi agakpe djonɔn le yo texoe. ¹⁹ Esi kakanɔn ekpewo, yi esidjanɔn kplɔnɔn agbetɔ yo mɔkpɔkpɔ. ²⁰ Wodjinɔn edji ku ŋsɛn kaka, yiyo game vayinɔn, wotrɔn yo ŋme ɖobu sɔ nyannɛ ɖaɖa loo. ²¹ Nɛ bubu le eviɛwo ŋtsilɔ, woŋ de nyane o, yi nɛ wo ɖigbɔ lɔ woŋɔn nɔn be. ²² Nɛ gloa yeŋtɔ yo ŋtsilan yo vev kpoe senɔn, yi yiŋtɔ luvɔn kpoe hanɔnnu.