¹ Samuel sɔ amigo yi kɔ ami ɖo tame nɛ Saul, Egbigbɔn nu ni, yi to ni be: Yehowa si ami nɔn be nazun amegan ɖo yo djukɔn Israel dji. Na ɖu a dji yi na hleɛn wo ta so wo ketɔwo kpata sime. Djesi tsi le ekpe ɖowɔ dji be Yehowa si ami nɔn be nanyi amɛgan do yo domɛnyinu dji lɔ yi nyi be: ² Nɛ wodjo le gbɔnyɛ egbɛ lɔ, wo la kpɔ amɛ amevé le Raxel yo yɔdoa gbɔ le Zelzax le Benyamin nyigba dji. Wola to nɔn be: wo kpɔ esɔnɔn tsi woe dji gbe wotsuta lɔ. Fifia etɔwo ŋde gbe lé djitsiwɔ ɖo wataɔ, ke boŋ elé nu xawɔ ɖo ta nɔn le totowɔ be: ŋde vɛ djɔ evinyɛ dji. ³ Nɛ wodjo le xɔn lɔ, wola va ɖo logotsia gbɔ le Tabor. Ŋsu amɛtɔn tsi woe yi nɔn vɔ sa gbe nɛ Mawu le Betel lɔ, lava dogo wo le xɔn. Ɖeka la gbɔvi amɛtɔ ɖo ta, amɛvegɔna la sɔ ablo amɛtɔn, yi amɛtɔ gɔna la sɔ ego tsi mɛ vain a le lɔ ɖa si. ⁴ Wola do gbe nɔn yi wola nɔ ablo amɛvé, xɔ wo le woasi. ⁵ Yo ŋgbodomɛa wola ɖo Gibea Elohim, afi tsi Filistitɔwo fii elanwo kɔ ɖoa. Nɛ wole edjua mɛ ɖowɔ lɔ, wola dogo Mawu yo nyɔn nuɖetɔwo hasoso ɖewo tsi ɖi so vɔsaxoe a lɔ gbɔnnɔn. Atsi kpɛn, ɖoŋdoŋ, Ekpɛn kudo kasaŋkuwo la nɔn ɖiɖiwɔ le ŋkɔ nɔn yi wo la nɔn gbefan ɖewɔ. ⁶ Zeeɖeka kpɔa yo gbɔngbɔn ladjɛ djiwo, wola trɔ zun amebu yi wo tsan wala tɔ gbefan ɖeɖe kudo wo. ⁷ Nɛ djesi xɔn wo le mɛ vawɔ lɔ wɔ ŋde kpekpe tsi djro woa, ɖoŋtsia Mawu le kudo wo. ⁸ Yiŋtsia djeŋkɔ nanɔn Gilgal yi o. Ŋgbɔnɔn gbɔwo ava me nu, yi na sa ŋtsifafa vɔ nɛ Mawu, tɔté kpɔŋ ŋkéké amaŋdrɛn va sɛn ɖo gatsimɛ nato nutsi wo la wɔa lɔ nɔn. ⁹ Etsi Saul trɔ be yeadjo le Samuel gbɔ lɔ, Mawu na Saul yo nɔnɔmɛ trɔ, yi djesi tsi wo ŋtsi Samuel xonuxo so lɔ va me gbexɔn gbe. ¹⁰ Fifiɛ tsi yi toa dji a, kpɔɖa Mawu yo gbefantɔwo ha soso ɖe va do goe zeɖeka kpɔa Mawu yo gbɔngbɔn dje dji ku nusɛn, yi tɔ gbefan ɖéɖé kuɖo wo. ¹¹ Etsi amɛtsiwoe kpatae djesi san lɔ kpɔe yi le gbefan ɖewɔ le Mawu yo gbefanɖetɔwo dome lɔ, wobiɔ nɔnɔe wo se be: ŋde le kis via lɔ wɔ? Saul tsan ye le Mawu yo gbefanɖetɔwo domea? ¹² Ŋsu ɖe tsi so dju a me biɔ be: Mɛŋde nyi etɔ nɛ amɛyewo? Eye trɔ elo dodo nɔn wo be: Saul tsan ye le mawu yo gbefanɖetɔwo dome a. ¹³ Etsi ɖe gbefan vɔ lɔ eyi vɔ sa xoea. ¹⁴ Saul nyinɛ kpɔ Saul kudo yo dɔsɔvia lɔ yi biɔ wo be: fiŋde miso? Saul ɖo ŋtsi be: miso esɔnɔawo dji gbe. Etsi miŋde le woa kpɔ wɔa, miyi Samuel gbɔ. ¹⁵ Saul nyinɛa biɔ be: nyan ŋde to nɛmi? ¹⁶ Saul toni be: ekan ɖo dji nɛ mi be: wokpɔ esɔnɔa wo xoxo. Vɔa ŋde tɔ tɔ enyan tsi Samuel tɔ ni sɔ kuɖo yiŋtɔ yo fiɔ ɖuɖu a lɔ ŋtsi nɛ amɛɖekpekpe o. ¹⁷ Fifia Samuel yɔ Israel djualɔ va bɔ sɔna ŋkeke nyui ɖuɖu le Mizpa. ¹⁸ Yi to nɔn wo be: Yehowa, Israel yo Mawu lɔ be: ŋkplɔ mi to so Egypte nyigban dji yi ɖe mi to le Egyptɔwo lɔme. Enyɛ ke ɖe mi le djidutɔ tsiwoe le mia ziɔ do anyigban tsan wo lɔme. ¹⁹ Vɔa egbea, migbe enye miɔ Mawu a lɔ, tsi ɖe mi le djɔ gbe vɔnɛ wo kudo hianhianwo kpata me lɔ, yi mi biɔŋ be maɖo fiɔ nɛ yewo. Yiŋtsi miva djɔ ɖo Yehowa yo ŋme ɖo miɔ kɔta kudo amɛ akpeakpe wo nu. ²⁰ Lexa Samuel na Israel yo kɔta wo kpata dɔn va ŋkɔ, yi wa da kɔ, akɔda nua lɔ va dje Benyamin yo kɔta dji. ²¹ Ena Benyamin yo kɔta me tɔwo zɔn va ŋkɔ ɖo nu nɛ wo xomɛa wo, yi wodji djre nu yi dje Matri yo xomɛa dji. Etsi wodji djre nua ɖo xomɛ tɔawo dji a, nudjidjre vɛ dje Saul, kis vi a lɔ dji. Wodi vɔa woŋde kpɔe. ²² Lexa yigbe biɔ nu Yehowa be: ɖe amɛa va fiyia? Yehowa ɖo ŋtsi be: kpɔ ɖa, Saul bé ɖo agbanwo gbɔ. ²³ Woxu dju yi vɛ kplɔe va. Etsi eté do amewo dome lɔ, amɛ djidjiawo sɛn abɔta nyi. ²⁴ Fifia Samuel to djukɔn a be: ametsi Yehowa tsia lɔ yi nyi yé amɛɖe kpekpe ŋdesɔ kui le djua mɛ o. Amowo kpata daxua hooo be: fiɔ nɛ nɔn agbe tɛgbɛɛ. ²⁵ Fifia Samuel hlɛn fiɔɖuɖu yo kɔnuwo kpata fiɔn djua lɔ. Eŋlɔ wo ɖo xoma mɛ sɔ da ɖo Yehowa ŋmɛ yo ŋgbodomɛa eda tsi le amɛsiame wo trɔ yi woagbɔ. ²⁶ Saul tsan trɔ yi yo nɔxoe le Gibea kanlɛntɔ ɖewo, tsiwo Mawu hɔna dji na lɔ kplɔe do. ²⁷ Amevlo ɖewo to be: le de ame yé la tɛnŋ xɔ nɛ mi? Wodo vloe yi woŋde sɔ nunana ɖekpekpe va ni o. Ke ele eɖokui kpɔ be ɖe ŋde se o nɛnɛ.