¹ Yaneko káxe,apepomaka êno xâne, Yoko ákoti nikokónoti nikáhiko, yane ina ihaxíkoa Jesus né ihikauhiko kixóvokoxoane: ² Ngóseana ra xanéhiko ovâtine mopo'âti káxe óvohexea njokóyoke vo'oku ákonehiko nîka. ³ Enepo mbahukápahiko óvokuke ákoti níka, ikorókovotimohiko xenékuke. Vo'oku ako malíka úkeaku po'ínuhiko. ⁴ Ina kixôa íhikauhiko: ná'ikopomo vínixoponea nikokónoti motovâti koemataxeahiko Yara mêum ákoti ovâti?". ⁵ Épemo'ikoane Jesus: "Ná yé'aye pâum apêti?". koenehiko: "sêti kôe". ⁶ Yane pahúkoane Jesus ivátahikea poké'eke ne xanéhiko. Ina veyôa ne sêti koeti pâum, ikoró'ixovo xoko Itukó'oviti, honó'okexoa íhikauhiko motovâti pórexea êno xâne. ⁷ Ápemaka Kali ye'á koeti kálihunoe hôe, íkoro'ixinovamaka Jesus xoko Itukó'oviti, ina pahûko íhikauhiko pôrekexea neko xanéhiko. ⁸ Héu kôe neko xanéhiko níkea koane imátaxeovohiko. Ina itixopamaka íhikauhiko Jesus ne itátanehiko nikokónoti haxâti, kopúhikopoikomaka séti koeti hánaiti sêsta. ⁹ Yoko itópono kuaturú koeti Mili hóyeno yanekoyo. Ina pahukópa Jesus pihópea neko xanehiko. ¹⁰ Pihóponehiko vatékeke yoko íhikauhiko pihónehiko ya poké'exa Dalmanuta. ¹¹ Kenó'ohikone evo farîseu yane turíxovone okópea jesus ya emo'útike. Épemonehiko ápeyea nóixonehiko vanúkeke, motavâtihiko kutípea. ¹² Yupíhova ikótivexea isóneuke yá omíxoneke ómixekovone, koene: "Na koeti'iye epeminohikó noixea iyupánevoti vanúkeke yara koêku? Ngixópinoe koatíke kaná'uti âvomo neixonenoe yara koêku". ¹³ Yane, kuríkoanehiko, ûrukopovonemaka vatékeke pihópone poxô'oke. ¹⁴ Yoko notú koehiko ómea pâum ne íhikauhiko Jesus. póeha pâum apeinoatihiko xoko vatékeke. ¹⁵ Yane êto'okoanehiko Jesus: "Néxapunoe yoko keunakîpanoe ne váhere itúkeovo farîseu yoko váhere itukeovo êrodi". ¹⁶ Yane kixókokonehiko ne íhikau: "Ákoti páum na ûti yuvâ". ¹⁷ Éxo kíxea Jesus isonéuhiko, kixóvokoxoane: "Na koeti'iye ako páum na ûti ké'inonoe? Avo yéxinanoe iséneu? Avonoe yéxa? Tíu'iti yomíxonenoe? ¹⁸ Ápenoe yûke itea ako ínixe? Ápemaka kîno itea ákonoe keâma? Ákonenoemaka puyákapa yokóvo? ¹⁹ Yaneko mborekéxo sîngu koeti pâum xapákuke sîngu koeti mili xâne, ná yé'a sêstu haxâti? "Ndûse kôe" koenehiko. ²⁰ Kene enepo mborekéxomaka séti koeti pâum xapákuke kuâturu koeti mili xâne, na yé'a sestu hâxa"?. "Seti" kôe koenehiko. ²¹ Yane épemoanehiko Jesus: "Avo yéxanoemaka?" ²² Simónehiko ya Betsaida. Omónehiko komítiti ne xanehiko épemone ra pirú'okea jesus. ²³ Namúkeane Jesus vô'u yane ómane ákotike malîka ipuxóvokuti. Ápuru'ikeane ûke ipího vô'u, kíxoane: "Ápe ínixene?". ²⁴ Kopíxekone ûke, koene: "Noinjone hóyenohiko kutí koeti tikotihiko yonôti". ²⁵ Pirúkopeanemaka Jesus ûke; yane inixopone ne hóyeno sásasa koyepone ínixopea. ²⁶ Pahúkopane Jesus óvokuke yane kixoane: "Hako yurúkovo pitivokoke" ²⁷ Yane pihóne Jesus yoko íhikauhiko xoko ipuxóvokuti Cesareia de Filipe. Xenékuke, épemo'ikoanehiko Jesus ne íhikauhiko: "Kutipera itukóvo ûndi ya emó'uke ne xanehiko?" ²⁸ Koenehiko: "Maha iti Xuâm, ihaxoneti Mbátita koehiko. Po'inuhiko: Íliya kixopi, 'porofeta koehikomaka". ²⁹ Épemonemaka íhikauhiko: "Kene îtinoe kuti keyúhonoe itukóvotiye ûndi?". Yumópane Pêturu kixoane: " Iti Cristo". ³⁰ Ixíko'okoahiko Jesus ákoyea eta'ahea Itukóvotiye. ³¹ Turíxovone íhikaxeahiko Jesus nókonemo vékea ne xe'exa hóyeno kónokea koitoponeovo kotiveti, puvâtimo úsotihiko xâne, inuxínoti sacerdoti yoko eskribahiko, koepékokonotimo, iyukópovotimo mopó'apeke káxe. ³² Koene yûho ya ákotike píkone. Iháxikoane Pêturu, haxá kíxoa yúho'ixea, hako koené'eye yiûho kixoane. ³³ Ina inanéxinova Jesus ne ihikauhiko, sayá'ikone Pêturu, kixoane: "Ingéneke yapa, yahíkaxapu satanái! Ako ípihinea iséneu ra ituke Itukó'oviti, itúkovoke hóyenohiko yóvohexo". ³⁴ Yane ihaxikoane Jesus neko êno xâne koanemaka íhikauhiko: Koêkuti kahá'ati hókeonu, hákone ûndi exâ kê, itea yókoina ne kirúhuna hekánu. ³⁵ Koêkuti kahá'ati íteovo, évokotimo ápeyea, itea koêkutimo evókoti ápeyea vo'ónguke yoko vo'oku emó'u, itóvotimo. ³⁶ Kutimo itópono ítea uhá koeti mêum ne hóyeno evokotimo mani íteovo? ³⁷ Kutí ikoponi poréxopo ne hóyeno motovâti esá'ikea unatiyea koeku? ³⁸ Koêkuti teinónuti yoko teinoâti ra emó'u xepákukenoe itínoe pahukóvoti, teyopópitinoemo ne Xe'exa Hóyeno kena'apane natíxokuke Há'a xanépeamaka anjuhiko.