अध्याय 13
1
ए बाय बोणहा तुमु एक दिहराहा मोंग कोरता योयजु !
2
ओनजावडा माणहोह आवबाव कोरीन पावणाय कोरने विहरता जुण , एहे कोरनेमा थुडाक माणहे सोरगदुतोन वी ओनजावडामा आवबाव कोरीन पावणाय कोरला से ।
3
ज्या वस्वास्यामा कुण बी कुड वाडामा सेते तीनुह मोदत कोरने जुण विहोरता ! तोनुहाते जेलोमा से आहलो सोमजु , जेहे च्या तिंदरा डिलोमा दुख वेठतला तेहे तुमुबी तिंदरो दुख तुमरा डीलोमा वेठतला एहे सोमजु !
4
आखा माणहे वियावोह इज्जुत एने सुकलो सोमजणु जुवे माटी एने लाडी एक दिहराह एदरायणु नी । जोर च्या सीनावो कोरनाय एने दिहरान बायराह दोरणाय रोपेते बोगवान तीनुह नियाव कोरहे ।
5
पोयदान कोरता हाय हाय जुण कोरता ज्यो कायसे तीनामा नीरहा रोयनु , काहाके बोगवानुज एहे कोयु , मी तोहो नी सुडो , एने तोहो कोदीनी वीहरो !
6
कोरीन आमु हिम्मोत हाते कोयतला पोरबु मेहे मोदत कोरनारू से ते मी नी बीव । माणहे मारो काय बीगाड सोकतला ।
7
ज्या पुडारी तुमुहु वी बोगवानोन वातु हीकाड्या तीनुहु ओर कोरजु ! तिंदरा जीवाय दोखा ज्या काय हाजा कामे ही क्या च्या आखा ओर कोरुनु । एने च्या जेहें बुरहु कोरया तेहे तुमु बी बोगवानोपोर बुरहु कोरजु ।
8
यीसु मोसी काल एने आज एने जोलमकुज एक हारकुज रोयहे । च्यु कोदी बोदलनारू नींबहे !
9
कोरीन हाजी वातोन वीरूद मायली नोवली ठोग हीकोन फोसोव जुण जाता । खाणान बारामा नेम पावणेम मोन जुण लागाडता काहाके ओहलो कोरनेमा कायीज फायदु नींबहे बाकीन बुरहामा बोगवानोन कुरपामा पोवका रोयजु ।
10
आपणे कोरता एक उटलु से च्याहरी बादा चाडावला खानो खाणे बोगवानोन पोवित्र तोंबान सेवा कोरनारा पुजारान होक नींबहे ।
11
येहुदीन मुखी पुजारू जोनवरोन लुयोह पोवित्र जागामा लीजातलु एने च्याहरी च्यु लुयोह पापोन कोरता लोडावतलु । पुण जोनवरोन दोड डेरान बारथे होलगाडनेमा आवतलो !
12
तोहलो यीसुबी मानहोह तेरे सोतान लुयो कोरीन पोवित्र कोरनेन कोरता दुख वेठावे येरूसलेम सोहरोन जुपान बारथे तेर सोतान लुय वोयाडीन मास्यु ।
13
कोरीन आपु डेरान बारथे निकोवतलान होस आपणी बादा चोडावणेम आखा जुनला रीते सुडीन पाप दोखा वाच जाणेन कोरता यीसु वाहा जाता एने तेरो नाव बोदी आपु पोर ली लेता ।
14
इन दुनियामा आपुहु रोयणेम कोरता जोलमकोज घर नींबे , पुण आपू आवणारा जोलमकाज रोयणेम गोरोन कोरता आसा कोर रोयला !
15
कोरीन यीसुन मोदत दोखा आपू बगवानोन बोडायीज बादाहा चोडावता एने आपने मुयो कोरीन तेर नावोह उकारीन गुण गावता रोयहु !
16
हाजो काम कोरने एने एक दीहराह मादत कोरन विहोरता जुण । काहाके चीज बोगवानोह पोरे ओहली बाहा से ।
17
तुमरा मोडलीन पुडारी मानहोन वात मानीन रोयजु एने तिंदरा आदीकारोन काबामा रोयजु । तुमरी आत्मिक जीवाय सोमावणेनुज तिंदरो काम से । एने तीनुहु तिंदरी टोवान कोरता बोगवानोह इसाब आपणु पोडहे ।
तिंदरी वात मानीन रोयजु तेतार च्या खुसीमा बोगवानोन सेवा कोर सोकतला , जोर च्या दुखोमा सेवा कोरता ते खोरखोर तुमरू नोफु नी रोये ।
18
आमरे कोरता पोरथना कोरजु के आनुहु खुब पोक्कु बुरहु एने मायलो सुखलो मोन जुवे , काहाके आमु आखा हाजा कामे कोरने होमेस्या हुतला ।
19
बोगवान मेहे फोसु तुमुपाहा जोलदी मुकोलनु जुवे कोरीन खुब पोरथना कोरनु ।
20
सांती आपणारू बोगवान आपणु मोटलु गुवाव्यु पोरबु यीसी मोसी होह जोलमका लुयो कोरीन मोरलामा दोखु जीवतु ओय्यू । एने तेर मानहे मेंडान होस से ।
21
च्यु बोगवान तुमुहु आखो हाजो काम कोरने हीकाडहे तीनामा तुमु तेरी मोरजी पुरी कोरहे ! एने यीसु मोसीपोर बुरहु कोरनेमा तेर नोजरोमा बागवानोह काय पोटतलो च्यो कोर सोकहे । तेरी बोडायी जोलमकीज ओयती राये , आमीन ।
22
ए मारा लाडका बायहो बोगहा, इन आयती चिठ्ठीमा मी काय लेख रोयुहु ज्यो दयान लागाडीन दीर दोरीज होंबावणे रावण्या कोरतलु ।
23
तुमु जाणतला के आपणु बायह तीमुथी एवी जेलोमा दोखु आवलाग्यू ।
24
तुमरी मोंडलीन आखा पुडारी माणहोह एने आखा पोवित्र माणहोह जेस यीसु कोरजु , इतालिया देसवाला बी तुमुहु जेय यीसु कोयतला ।
25
मी पोरथना कोरतलु के बोगवान तुमु आखापोर तेर कुरपा देखाडे । आमीन ।