अध्याय 11
1
एवी विश्वास आशा कोरी खोरय एने नी देखली वस्तुन प्रमाण हे
2
पेल्ला वारामा डायडाया बोगवानोपोर खोरू बुरहु कोरला , कोरीन बोगवान तिंदरा बारामा हाजु पुरावू आप्यु ।
3
बुरहामा आपु जाणतला के बोगवान तेरा बुलोमाज आखी कोवी गोडलु , जेतार बोगवान गोडणे बाज्यु तेतार ज्या काय आपु देखतला च्या कायीज नी ओतो ।
4
हाबील बोगवानोपोर बुरहु कोरयु कोरीन तेरू मोटलु बायहो केयनोन बाहा चोडावणे दोखु बोगवानोह एक दोम हाजी बादा चोडाव्यू , हाबील एहे कोरलु कोरीन जेतार बोगवान कोयलु तीन टेमे हाबीलोन बादान बारामा गोवायी आपीन , बोगवान हाबीलोह दोरनी कोर एने हाबील मोर गोयू , ती बी आपू एवी बी तीना दोखा बोगवानोपोर बुरहु कोरनेन बारामा हिकतला ।
5
यो रहे के होनोक बोगवानोपोर बुरहु कोन्यू , कोरीन बोगवान तीनाह सोरगोमा उचली ली गोयु , तीनामा च्यु नी मोरयू , कोरीन च्यु कुणीहीज नी देखायू काहाके बोगवान तीनाह च्यु दुनियामा रोयतोतु तेतार सोरगोमा उचली लेणेन पेलेन बोगवान पुरावु आप्यू , के च्यू मेहे पोरे ओहलो जीवाय जीवलु
6
बोगवानोपोर बुरहु कोरे विगुर कुणबी बोगवानोह खुस नी कोर सोकतला । च्यु कुण बोमवानोन आसरू लेणे हुदतलु , ते च्यु बोगवान जीवतु से एने ज्या तीनाहा हुदणारा से तीनुह आसीरवाद आपहे कोरीन तीनापोर बुरहु कोरनु पोडहे !
7
नुहु बोगवानोपोर बुरहु कोरलु कोरीन च्यु कोदी नी देख्यु ती बी बोगवान तीनाह चेतावणी आपीन जाहान बोगावणे लागाड्यु ते च्यु तेरा कुरमो मायला वाचाडनेने कोरता मोटली जाहाज बोणाव्यु एहे कोरनेमा च्यु एने तेरो पोरिवार मायला कायनी मोरया । तेरे बुरहामा कोवीन माणहोह गुनावाला ठोराव्यु च्यु बरहु कोरलु कोरीन बोगवानोन नोजरोमा घना काय कोरणारान दोरमीन वारीस बोण्यू ।
8
आबराहाम बोगवानोपोर बुरहु कोरलु , कोरीन जेतार बोगवान तीनाहा हादलु , तेतार च्यु बोगवानोन वात मानीन तेरो देस सुडीन बोगवान आपीही कोयलु तिना जागामा चाल पोड्यु । एने आबराहोमह जहरी जातलु च्युबी मालूम नी ओले । तीबी च्यु तेरो देस सुडीन चाल पोड्यू ।
9
आबराहम बोगवानोपोर बुरहु कोरव्यू कोरीन बोगवान तीनाहा वायदु कोरलु तीन देसोमा च्यु पोरायान होस वोह गोयलु आबराहाम तेरा पुरया इसाक एने याकुब हाते वारीसोन होकदार बोणीन तीना ताबमा रोयू ।
10
काहाके आबराहाम जोलमकुज रोयणेवावा सोरग मायला सहरोमा जीवने वाट जुवतोतु तीना सहरोह पायू नाखीन बोणावणारु बोगवानुज से ।
11
बुरहु कोरनेमाज आबराहाम बाह बोण्यु च्यु एने तेरी लाडी सारा पुरया पोयदा कोरनेन वोथ जात रियली , ती बी सारा वायदु कोरनारू बोगवान इनानदार से कोरीन बुरहु कोरीन ताकोत सापडावीन पुरया पोयदा कोरली से
12
कोरीन आबराहाम पुरयो पोयदा करनेन वारामा खुब डायलु ओतु , कोरीन तेरो डील मोरलान होस से तीना एकुज माणहोम दोखु सोरगोन तारान होस एने दोरियान मेरेन रेवटान होस गीणाये नी मोहला बोगवान तीनाह जेहे वायदु कोरलु तेहे खुब होंटा माणहे पोयदा ओयला !
13
या आँखा माणहे मोरे ताहालोगोण बोगवानोपोर बुरहु कोरता रोया , बोगवान काय वायदु कोरलु तीनुहु च्यु काय नी जुड्यों , पुण च्या सेय दोखा तिनुहु देख्या एने बुरहु कोरीनुज खुब खुस ओयीन मान लेदया । एने च्या कोवीमा रोयणेन टेमे दिहराह कोयला के आमु ते पोराया माणहे से , एने वार चाल फिरनारा से ।रहे कोबलीन मोर गोयला !
14
तीनु माणहोन जीवाय दोखो आपुहु जालुम पोडतलो के च्या माणहे जोलमकाज रोयणेन तिंदरा सोतान देसोह हुदता रोयला !
15
जोर च्या सुडीन आवला तीन देसोह फोसा ओर कोरता ते च्या फोसा फीरीन जात रोयता !
16
तीनाह नी पुण तीना दोखा वोडीन च्या खुब हाजा जागामा रोयणे गोरोन इस्सा कोरला , कोरीन बोगवान तीनुहु तेरे होते रोयणेन कोरता एक सेहर तीयार कोर रोयुहु एने बोगवान सोताह तिहरु बोगवान कोवायणे कायनी लावायतलु !
17
आबरहाम बुरहु कोनेमाज जेतार बोगवान तीनाहा फारक्यु , तेतार आबराहम तेरे खास सुरु इसाकोह बादम होरु चोडाव्यू
18
एने बोगवान तीनाह कोयलु , ओतु के इसाक तारू पुरयू तीना दोखो तार वोंस कोवायहे , बोगवान दोखु आबराहाम यु वायदु सापडावीन बी बोगवानोन वायदु पुरु कोरनेन कोरता तेरो एकुज पुरयाह बादा चोडावणे तीयार ओतु !
19
आबराहाम विचार कोरयू के जोर इसाक मोरे तीबी बीगवान तीनाह फोसु जीवतु कोर सोकतलु । तीन बरहामा आबराहाम तेरा पुरयाहा बादा चोडावने ली गोयलु , ओतु . कोरीन फोसु तेरो पुरया तोहलुज नोस्साणीन होरू जुड मोयलु ।
20
बुरहु कोरनेमाज इसाक तेर पुरयु याकुब एने एसावोह बोवस्यमा बोगवान आसीरवाद आपहे कोरीन आसीरवाद आप्यू !
21
याकुब बुरहु कोरनेमाज च्यु डायलु ओयीन मोरनेन टेमे युसुफोन एकेक पुरयाह बोगवान आसीरवाद आपे कोरीन तिनुहु आसीरवाद आपीन ज्यु मोरनेन पेल तेरे आथो मायली लाकडीन आदारे टेकुलीन बोगवानोह वोंदयु ।
22
युसुफ बुरहु कोरनेमाज जेतार च्यु मीसर देसेमा मोरनेन ओतु , तेतार च्यु रहे कोयु , बोगवान इसरायेल माणहोन मीसर देस दोखु ली जाहे , तेतार तिंदरा माणहोह तेरा आटका बी कोनान देसोमा तींदरे होते ली जाणे हुकुम आप्यु !
23
एने मुसान आय बाबा बोगनानोपोर बुरहु कोनेमाज मुसा पोयदा ओयीन ओवतु तीन मोयना लोगोण हिम्मोत कोरीन तीनाहा लाकाडीन मेक्या , काहाके च्यु गोण हानु ओतु ! एने मीसर देसोन राजान मारनेन हुकुम देखीन च्या काय नी बीतोता ,
24
फिरोन राजान सुरी मुसाहा मोटी कोरली ओती । मोटु ओयीन ओवतु च्यु बोगवानोपोर बुरहु कोरनेमाज च्यु फिरोनोन सुरीन सुरु कोवायु एन राजान ओवालीमा रोयणे आखोज सुड देल्लु ।
25
च्यु थुडाक टेमोन पापोन मोज्या मारने सुडीन बोगवानोन माणहो होते दुःख वेठणे नीवाड लेदयू !
26
च्यु मीसर देसोन माल दोनोन मोज्या कोरनेम दीखो मोसीन कोरता दुःख वेठणुज मोटो सेमज्यू । काहाके तेरो मोन जोलमका वाटोन इलाम आपडावणे वाट जुव रोयलु !
27
जीना बोगवानोह कुणीज नी देख सोके तीनाह च्यु देखतलु सोमजीन मुसा ओगोव बोडतु गोयू । एने च्यु बोगवानोपोर बुरहु कोरीन राजान खामे देखीन नी बीतोतु , एने नीसर देसोह सुड देल्लु !
28
मुसा बुरहु कोनेमान इसरायेल माणहोह फासकान तीवार वावाडने हुत्तोतु । एने माणहे मेंडा बुकडा मारीन लुयोह जुपीन चैवखोरोपोर सीतडाटणे रीती कोरने हुकुम आप्यू तेतार बोगवान मुक्कोल्लु , सोरगदुत ज्यु पेल्ला पुरया मारणारू से च्यु इसरायेल माणहोन पोरिवारो मायला पेल्ला पुरदा नी मारे ।
29
बुरहु कोरनेमाज इसरायेल माणहे हुकला जागामा चालतलान होस रातला दोरियामा चालीन गोया । पुण मीसर देखवाला बी तोहला पाणीमा चालने कुसीस कोन्या ते च्या बुड गोयला
30
इसरायेल माणहे बोगवानोपोर बुरहु कोरनेमा सात दीही बीतडान सोमखेर फिरे लेदया ते देरीहो सेहरोन बीतडो उदरी गोयलो ।
31
राहाब यी एक रांडी ओती , पुण च्यी बुरहु कोरनेमाज कोनान देसोह लिकायीन तोपासणे आवला तीनु दोय माणहोह पाववान होस सांतीवार आवबाव कोरली कोरनेन च्या बोगवानोन वात जी मान्या तीनु आखाहा मारने आव्या तेतार तीनीही नी मान्या पुण ची वाच गोयी ।
32
उंजु बी दिहरा माणहे बी बोगवानोपोर बुरहु कोन्या तिंदरा बारामा मी कोयो के जोरमी गिदोन , एने बाराक एने सीमसोन , एने यीफतहा , एने , दावुद एने सामुयेल एने बोगवानोन बोवीस्य कोयणारा आखान बारामा कोयणे जायीही ते टेम नी पुरे !
33
तीनु मायला थुडाक बोगवानोपोर बुरहु कोरला कोरीन राजानुहु आरावला, दोरमी कामोन रीते जीवाय जीवीन बोगवान वायदु कोरलु च्यो सापडावला एने सीवोन मुयोहो बोंद कोरया ।
34
बुरहु कोरनेया थुडाक माणहे आगठान आस दोखा वाच गोया , थुडाक माणहे तोलवार दोखा वाच गोया । च्या माणहे कोम जुरीमा बी ताकोत वावा बोण गोया । एने युददोमा बाहदुर बोण गोयला एने दिहरा आखान सोयनीकोन दुवाहा आराव देण्या ।
35
बुरहु कोरनेमा थुडाक बायरा तिंदरा होगा मायलाह मारने दोखा फोसा जीवतला सापडावला दिहरा माणहे तीनुहु सोताडला , एने धुडाकोहो मार नाखला पुण च्या सोतावणी दोखा सुटकारू नी हुदया , काहोके च्या मोत दोखा फोसा जिवता ओयीन एकदोम हाजी जीवाय जिवणे आसा कोरताता !
36
बुरहु केरनारामा थुडाक माणहोह दिहरा भोजाक उडाडया कोरला एने तीनुहु चोपकडा कोरीन देल्ला ! दिहरा कोडा एने हाकवो कोरीन बांधीन तीनुहु कुडवाडामा कुंड देल्ला !
37
तीनुमा खुब माणहोह दोगडाच्या एने थुडाको नुहु तोलवार कोरीन चीरीन टुकडा कोर डेल्ला एने मार डेल्ला थुडाकोनुहु पेरने लुगडा नी ओता एने रोयणेन जामुनी ओतु कोरीन मेंडा बुकडान एने बुकडान खालडो पेरीन डोंड वाचताज फिरतोता , च्या गोरीबिमा वेला कोरता जायीन हिडा पिडा जेल्ला ओता ।
38
इनी कवीमा रोयणेन कोरता तीनुह लायकोन नी लागतोतो ! च्या बोगवानोपोर बुरहु कोरीन उजाडी जागामा एने बोयडामा एने गुलामा एने दोरतीन खुबाराम कोत्तान कोत्ता नाहता फिरतोता ।
39
या आखा पोक्कु बुरहु कोरताज रोयला , कोरीन बोगवानो दोखी इंदरी हाजी गोवायी जुडी । पुण बोगवान ज्यु वायदु कोरयु च्यु कुणीही वी पुरोन पुरोनी जुडयों ।
40
काहाके बोगवान तीनुह कायतोरी खुब हाजो आसीरवाद आपणे बोजोट लागाड रोयलु ! पुण बोगवान तेरो आसीरवाद आपु होते तीनुह बी आपने पेलेन बोजोट लागडुले से ।