अध्याय 2
1
पुण तु ज्यी वात खोरी हीकाडनेन लायक से च्यी हीकाडया कोर !
2
डायला बाबानुह हीकाडजी के दीहरा तीनुह देखीन मानपान आवे ओहला च्या सोताह काबामा मेकीन रोयणु जुवे एने सोमावीन रोयणु जुवे एने च्या बोगवानोपोर बुरहु कोरनेमा एने माणहो हाते मोंग कोरनेमा एने दीर दोरनेमा पोक्का रोयणु जुवे
3
तोहलो डायला बायरान बी हीकाडजी के तींदरों वेवार पोवीत्र रोयणु जुवे च्या दीहरान वाको काडता नी फीरनु जुवे दारकुटया नी रोयणु जुवे पुण दीहराह हाजी वात हीकाडनारा रोयणु जुवे !
4
च्या तोहली जीवाय जीवणेमा जुवान बायराह एंहे हीकाडता रोये के च्या सोताह गोरवावाह एने पुरयाह मोंग कोरे
5
एने च्यी सोताह काबामा मेकीन पोवीत्र जीवाय जीवणारी गोरबार चालाडनारू दोहरान हाजे काम कोरनारी एने सोतान गोरवावाना काबामा रोयणारी जुवे तेतार बोगवानोन वातोन नावबोदी नी आये
6
इनसेहेज जुवान पुरयाह बी तींदरा मोनोह काबामा राखीन जीवणे सोमजाडतु रोयजी
7
आखी वातीन हाजा कामे कोरनेमा तु एक नोमुना बोणु जाजी जेतार तु हीकाडे ते इमानदारीमा एने उंडा हाजा वीचार दोखु हीकाडजी
8
होमेस्या खोरी हीक हीकाडतु रोयजी के तारू हीकोन कुण बी वाको नी काड सोके तेतार ज्या तारहाते जोखडी पोडने हुत्तला च्या आपुह बीगुर गुनावाला देखीन आपणा बाराहा खोराब कोयण तीनुह नी कोयजी नी सापड्यो कोरीन च्या लाजवाय जाहे
9
पावरोह सोतान मालकोन आखी वात मानीन चालने एने आखी वातोमा तीनुह खुस राखणे एने तींदरे मुया मुय नी लागुणु जुवे कोरीन हीकाडजी
10
एने च्या चुरी नी कोरनु एने ठोगुण नी जुवे आखा कामोमा हाजा एने इमानदार रोयणु जुवे तेतार इंदरा हाजा कामे देखीन दीहरा माणहे वाचाडनारा बोगवानोन बारामायली हीक होंबीन मोन फीराव लेये ओहलो तीनुह हीकाडजी
11
काहाके आखा माणहोह पाप देखा वाचाडनेन बोगवानोन कुरपा देखाय गोयली से
12
एने आपुह हुकुम आप्यु के आपु बीगुर बोकतीन एने कोवीन पापोन लालुच सुडीन इनी खोरब दुनीयामा सोतान जीवोह काबामा मेकीन हाजा वेवार हाते बोगवानोन बोकतीन एने दोरमीन जीवाय जीवणु जुवे !
13
जीना खुब बारी दीहोन कोरता आपु आसा राखीन वाट जुवीन रोयतला यी आसा एहे से के यीसु मोसी खुब मोहीमा हाते दोरतीपोर फोसु देखायहे युज यीसु मोसी मोटलु बोगवान आपुह ! पाप दोखु वाचाडनारू से !
14
च्यु आपहु आपणा आखी बातीन पाप दोखु सुटकारू आपणेन कोरता एने आपुह सुखला बोणावणेन कोरता एने तेरू सोतान माणहे बोणावणेन कोरता एने आपु जीत पोडीन तेरा हाजा कामे कोरनेन कोरता तेरू सोतान जीव बादान होस चोडावलु से
15
यी आखी वात मोंडलीन माणहोह हीकाडतु राये एने वीस्वासी माणहे नी सुदरे ते हाके हाते सोमजाडीन हीकाडजी काहाके कुण बी तोहो कामे सोमजणे सोंदी जुण आपतु !