¹ Negubutu, ni ogo nanaya, yama ni ada imimi ragohisa, hari magevaramu vaina orogisa renu noma hegiriva ragohisa, yai tagera aukamu enu, ² eige noka mage mimivara avanage gaha yau renu sua daure gahava yau, badivara koita aubougi gera beta gabidadama tera. ³ Eduge Rohi bauge gabidadama vahe, aukena a herogahare, renu daureva seni a beia gahisa. ⁴ Ni uhurera bereberera Rohi bauge uhurehe ai dainehe, eige aka kikivara renu dagedage no rogevare meva aka kikivara. ⁵ Rohi baugevana ai soruke gumava magegahisa Dirava mageve uhurahe renu oti Keriso uhu berebevehe. ⁶ Neguge noki ya kirogeva, ni ogonanuheya, Rohi bauge Iesu Keriso ihehe, yama yai ogonanuhe meve be kiki veite renu ni tene magurivehe a mane yauka maguri gahiga veite ra. ⁷ Era yaka yai yavahu dibanara yaka no nagate gahisa, badivara noka guragu kava veitera no yaruga uiegei. ⁸ Noka koitabe hauhakave mi damunava kiki veitera, eduge nomu me miege vahi mi vani mi, eige noka beta isuke be yai mohigeisa. ⁹ No ona kine makavara beta noka hedo veite dainehegera, eduge no kine makavara, yaka eragare dibana gahisa, eige yaka no kine ya gainage kisa. ¹⁰ No yaruta uiegei, Nokamu yauki etogevenu, "Unuhuna me besibe vima auka beta tamutavara." ¹¹ Nakamu rhino yau tanahe be yabera guragu kava, me gahara veitera, eduge iagabe yau korahi ragoha. ¹² Eige koita ena vivi yabera noki kirogeva renu Iesu Keriso ihehe hero gahigeva, yauma me be kisa tabetabe eige yauna hauhakave be isa. ¹³ Eduge ya, ni ogonanuheya, ya negu mage kikiva hisiku ragohime. ¹⁴ Koita bena hari mage ihihi besibeva vima leta o uhurahe, yama au kiare erageisa renu ya negu auruta vasikime, au negu variva vime, eduge ama vasiba gahisa ai ogonane dainehe. ¹⁵ Anegu anai rome auka inai koitava ra, eduge vasiba gahisa auka ai ogonane dainehege gera. ¹⁶ Neguge mai Rohi bauge vana mai ya mohigeisa vani aubougi guma aubougi uhurahe. Rohi baugera yai bougi ya ruta gera. ¹⁷ Da, Paul di adehegera daki leta o toreima, leta aubougi adahegera di toage ramu enu. ¹⁸ Iesu Keriso ni Rohive haire yai bougi miahe. Amen.