¹ Ni Rohite Iesu Keriso ororove renu no auruta bouragohare, eige noki imimi ragoha, ni ogo nanuheya, ² eige ya negu gauragohime se dauragohime, suabe se gabenu orogima, se toretore benu noiseni orogima, makavadi vara ni Rohite ororove ramu subuta oroganu. ³ Be negu gumabei a taragime, Era beta vara ate morumo vaniva orogarei renu aena dibana veite koita horivarei, daure kiare gamikava. ⁴ Era aukaki inai Havara gahare renu avahu aumi Dirava meve besibe gahare renu se mote gahare besibe gahima. Edainehe, suki dubu uhura guramima renu avahu aumi Dirava roma. ⁵ Ana anana veitenu da e aruta, iaga o yabera daki akironu? ⁶ Akamu o binadibana goinu otadovanu kamui uma, emakava ramu au roeare vani vagena auna horivisa. ⁷ Aena uhuanana vara o bina memima, koita beramu enu eraki kamui uma ate yau mi itahe hakiragohege. ⁸ Eigena aena kamui uiare ra horihovara, Iesu Keriso ra gamigavara au nonomuvehe eige auka iagabe veite goigovara au ororo riagavaraei. ⁹ Aena dibana veite koitava ororovara Satan meve kiki hedokehe gera, erara nunenune ya renu avanage gauragira iagava yau, ¹⁰ renu iaga nunenune daurevaya dauragohare koitava yau, badivara yauka maguri riaga renu maguri gahara veitera. ¹¹ Edainehege Dirava raki guma nunebei iagabe besuganu yauka avanage e riaga gahisa. ¹² eige yauka yua bouge huhunagohisa bafivara yauka maguri riaga gahiga veitera eduge hegiri ragohanu beta uhuanana mageva gera. ¹³ Eduge noma vani aubougi Dirava mage gahisa ai dainehe, ogonana ni Rohive magevehe, badivara Dirava raki ya idigevenu yaka urugoi iditahaka nagate maguri misa Horu renu riaga uhurahe. ¹⁴ Eige auki a ihiromonu hari mage uhurahe, eige aka ni Rohite Iesu Keriso haire misa. ¹⁵ Edainehe, ogo nanaya, yama rahi berebe ragohisa, renu yai tene magurive Yama kamui mage gahisa, gava seni se torevanehe. ¹⁶ Negugera ni Rohite Iesu Keriso au avahu renu Dirava ni Mame, no hegiri gahigei renu mage behibehive noni kinu renu ihie orogare mageva au haire uhurahege nona misa, ¹⁷ mage renu yai sorukehe herokisa me mage aubougi uhurahe renu gavatage.