Capítulo 1

1 Co'o Judas, Santiago njan apialheng co'o, asto njan jeiasennaicama Jesucristo. Nlhenquec ewalhoc apquellelto apqueliequiescama Engiapom Neten aniem'o apquellamelaiam, apquellelto njan apqueltacmelquescama m'a Jesucristo. 2 Asqueltawec na ewaiwesentac tacjaplhet'oc aquiawai'a nque nengietnai'o nenga'at anac, metca actaicama enwalhoc canjan nengamelaiam anac jam. 3 Quetlhencap elialheng'a asquellamelaiam, awanje squeltema anactalhesquesec actemacja m'a nengeluoncasemmalhca nac tep, cacpota njan asmajai'a aleltennasancoc eliawencasoc apqueltacmelquescama meliasqueiam anac nema allaicamoc alhta aplhamacjo apquellelto nac Jesucristo apquennemolhema. 4 ¡Ellajo ta m'a enenlhet'awoc meliamolhma nac apqueluai'o lhna lhta mota jam apiesecsec anac quetlhencap! Apquelpasmecjec na lhta quetlhencap ma'a, apqueliennenquescamo lhna lhta njan, apquellaneianquec na lhta lhamacjo actemacja caselha ncollatsecama atlheianmo apualho'oc metca apiaqmoncasecja Engiapom Neten aniem'o apiamolhma, menmaiancoc na tacja m'a apto lhema apjapac apuesque engancoc Jesucristo. Tep nac nanec nlheianmec Engiapom Neten apaioma etlhewancoc jata nema aliaqmoncasquesecja apqueltemacja m'a. 5 Smac'ac atlhenquesquescacjoc na apualho'oc quetlhencap ma'a apnaqtewasecjo lhnac nanec Engiapom Neten Israelitas apquellelto la apqueliasqueiam necsa apqueljatsosquecja lhnac nanec ma'a aquieto Egipto. 6 Apcacjaianquec nac nanec na enenlhet neten melleliejecjo' Engiapom Neten, melietemo lhnac nanec apquellanemmacpelha etnancoc ma'a, apqueliengiecjo lhnac nanec na apquellomacja, ca ncanec Engiapom Neten apquelhacjamo lhnac nanec aisecsec ienactesacja lhma apnactamo, apcacjanquec mocjom ma'a nenwanlha nac acuiacmo ta njan acnem aquientalhnenwaiam nengiecpelcammalhquelha. 7 Apquellengaianquec nac nec na aquientalhnema enenlhet'awoc ma'a co Sodoma canjan Gomorra canjan mo'oc apquellawacja necjau'a apquennemolhema, apquellaneianco lhnac na ne mota apquellanactema manganemmalhquelha nac antancoc, apquenmecjo lhnac nanec na apquenno lhemec ma'a, lhnac na nec na nqueniemai'ac ma'a apquetlhewaianco nema aliaqmoncasecja aptaiancolha aquieplomo talha metca acsepanai'a cacpota njan ncotnec nema allascama aplhamacjo enenlhet'awoc ellanancoc actemo nac ma'a. 8 Ncacjoc coca apquellengai'a niecje ania'a, apquellaneianquec apancawec meliamolha enenlhet'awoc apcacjanco nac apiesecsec anac quetlhencap jam, apquetlhenacpawe mota apancawec apquellelto apquelientalhemo aniem'o aluanmescama mota caselhaja, coca malha apquelpaisenquescama apiempeioc mocjom aptaiancoc ma'a aniem'o meliamolhma, man na nconmajai'ac elleliejecjoc apquelientalhnemo, apqueltacnonconquec na m'a alientalhnemo nac ma'a acnaianco nac neten. 9 Coca Miguel apto lhnac apuesque enenlhet neten, nwai'ac nanec na acuannammalhca apualhoc etacnewac ma'a awesque queliacjamei'o necsa apqueliamenammap ma'a apquenmeiommap apiempec apquetsepma Moisés, lhnac nanec aptemac ma'a: "Apuesque toca etacnewa lheia" lhna aptemac. 10 Coca apqueltacnewacquec enenlhet'awoc anac jam caselha acnaianco m'a neten, mancolatsema ellanancoc ma'a ncanec aselhtec apquelianweiacmo m'a. Mancollapuanca'ac najan ncolquetamama apualho'oc, malha caselha neujac la'a aquiantama nac aquietnacja actoma, ntewaselhquec na m'a aniem'o aljanemmalhca acmama. Apquennawec na m'a enenlhet'awoc anac meliamolhma jam. 11 ¡Aiii enenlhet'awoc la ie! Aptaianquec ma'a aptemacja lhnac nanec Caín, apqueliennenquescanquec enenlhet aniem'o aptengiaicamoc pataccom ca aptemo lhnac nanec na Balaam ma'a. Eletsepoc jata m'a aniem'o melleliejecjoc ca aptemo lhnac nanec na Coré m'a. 12 Jenmancascama anquec ma'a apquellanecamoc anac caselha ncollatsecama necsa apquelpasmecja quetlhencap ma'a actacmelaicama lhma apanco'oc anac ma'a acuesai'a nentaiancolha nenlhelhma ancoc anac, mamma apquellaiacja la'a aptawenco la aptecamoc, wanlha aptengiaicamo mota apanco'oc apancawec. Malha njan aptancoc ma'a iepjopai'a la metca acmamai'a acsenta, nsauque mota alhcaiam ma'a acmac'acja la ncoi'acsec, malha nja actonac la iamet nema aliaqtemanma nac aicapmen'oc, nquetsepquec na m'a, mancawanquec na ncoilhec aquielhna la'a. 13 Apquellanenque mota njan caselha jenmancascama, malha cotnac aquiacmopai'a nac alacjaiam iemmem aluata atsenta nac caselha apawoc alhammalhca la'a. Malha nja aptonac apiau'a la apiacmoncasecja mo'oc amai apancoc apmeiecjelha la'a, ncolhec jata njan actacnonwacjo ncolhec na apso aquiau'acja nquec ienactesacja lhma mancotnenwaiam annelha. 14 Enoc coca apto lhnac 7 apqueniem'o Adan aptawana'ac neptamen, apaiesaianca lhnac ania'a secjec anquec eluacja ta m'a enenlhet'awoc meliamolhma nac, lhna aptemac: «Nwet'aclhec ejaqtec Apuesque apquelhiacmo m'a, apquetlhelhma'ac coca apentalhnema enenlhet neten 15 cacpota eliecpelcoc aplhamacjo enenlhet'awoc, etlhenec alietemo nema aliaqmoncasquesecja apqueltemacja ncanec apqueltacnonconquec apuesai'a m'a» lhna ntemac acuetai'a apaqtec Enoc ma'a. 16 Ca enenlhet'awoc anac apquellelto m'a apqueliematquesaicama po'oc, apquellammelhma canjan aptengiaicamo mota caselha aleclemelha la apualho'oc, apquellammacpo pancawec, altacmanma niecje apquelpaqmeiasma ellanjoc po'oc napaqtec la'a, coca acjemo malha apquenmopuanca ania'a, wanlha coca mota njan aptengiaicamoc caselha apanco'oc apancawec. 17 Cotlheianwacjo ta njan apquellualho'oc quetlhencap apquetlheianmo lhta secje anquec apostoles apquellasennaicama apuesque engancoc Jesucristo, 18 necsa acmajai'a lhna lhta ncowac ma'a aptemonwanlha ta nnelha acnem, eluac jata enenlhet'awoc apqueliematquesaicama ania'a actacmanma aniem'o anmaicama aliasponcomacja nac apualho'oc ellanancoc ma'a, lhna aptaiancoc ma'a. 19 Apqueluai'ac colhuawe nac apiesecsec anac quetlhencap jam, apquellelto njan apquelhpanquescama aniem'o anmaicama aliasponcomacja apualho'oc ma'a, mamma sonquec Espiritu Santo apualho'oc ma'a. 20 Eluascap jatoca actacmanma nac meliasqueiam quetlhencap, elelmalhna ta mota aniem'o apquelpasmoma Espiritu Santo. 21 Etengiamo ta mota aliennactescama la'a acuesai'a nac jangamelaiam Engiapom Neten, eltemesques jata njan iocjalhmec anquec alleljalhnecama apualho'oc acnem ncowac jata jengellaicamoc aliennactema ennengio'oc ncotnenwaianlha nnelha aniem'o m'a apuesque engancoc Jesucristo apmapiose njan jengellanjoc ma'a. 22 Ellannenwom jata njan ma'a apqueliasqueiam anac, 23 eluonques jata njan tep apquenmaicamo nac amai acmaicamoc anac aquieto talha, ellapioso ta njan ellanjoc ma'a meliamolhma nac, coca melpasenwom anquec ma'a apquellanenco la ncollatsecama ncanec acuacjo apquelentalhnema malha aliepetcai'a la meliamolhma m'a. 24 Apuanquec Engiapom Neten jengelpasmoc cacpota mongellananquec caselha ncollatsecama, jengellalhnasquec na necsa mangeliamolhma, jengeliantemacjec na aquieto napaqtec actacmelacja m'a aquieplomo alpaijecja engellualho'oc. 25 ¡Jai, angeluenquesama ta apto lhema pjapac apuesque apuesai'a Engiapom Neten, apto njan jenwonquescama tep, aniem'o acnema apianweiacmo, apientalhnemo apanquec canjan acnema apmopuana! ¡Ntasec etnec Apuesque engancoc colhuawe nac canjan emmanie ta ncotnenwaianlha nnelha! Amen.