¹ Jliaji yempeti Samuel lrideeji Dio isho Eli icapatsa. Njaawajli pia jalredaoca corripia caacoca Diu nasho caidalritsa; corripia tsacja lricadaa nacapá carro coanca napeyajleo. ² Njite matjiraa piakena lrioma jliaji Elí, corri pienatsa lritaita lricapaca matsia, njite lrioshoa piaketsao lrioshoa carroita ricó. ³ Kerráa catoa jliaji camarrai Dio iipana lricoda, lrioshoa cadaneena lrimaa carró jliaji Samuel tsoomi lrioya jliaji wa Minalri iarcan. ⁴ Niini Dio iwanaca Samuel, njite Samuel jiepani: ''Alri njoaji.'' ⁵ Samuel jiecowa Elí ideshe njite lriaco lrisho: "Alri njoaji, pja piwanaca njoa" Elí iaco jiepacani: " cotsa nowanjenca pjia, washa pidia pioshoawa." Njitedalri Samuel idia tsenacja roshoawa. ⁶ Dio ipieta tsenacja iwanacani: "Samuel." Njite Samuel ipieta tsenacja iaca Elí ideshe njite lriaco lrisho: "Alri njoaji, pja piwanaca njoa." Elí jiepatsenacjani: " Cotsa nowanjenca pjia noeenipe, washa pidia pioshoawa." ⁷ Jliawajle Corri piatoa lrioketacjenca Dio iapiya jliaji Samuel, corrim tsaca jlimica iacoti lrinacjoitedantja. ⁸ Dio iwana tsenacja Samuel madalripia shopa. Lripieta tsenacja jlinicocawa lriacarro Elí ideshe njite jliaco lrisho: "Alri njoaji, pja piwanaca njoa." Njitedalri Elí iaji Dioca iwana jliaji yempeti. ⁹ Jliapodamina Elí iaco samuel isho: "Washa pidia pioshoawa; lripieta cada tsenacjaotsa lriwanaca pjia, cayo watsa piacoji: "Caco pjia no Minalri, catsa njoa pishodalri, njomintsa pjiai." Caicarro Samuel idia yoshoawa lioshoa carroita rico tsenacja. ¹⁰ Njite dalrina Dio ino njite lricañjataacawa; lripieta tsenacja lriwanacani cayoji lriwana capisho lrinita: "Samuel, Samuel." Njite Samuel iaco shepacani: "Caaco pjia no Minalri, icatsa njoa pishodalri, njomintsa pishó." ¹¹ Dio icaite Samuel isho cayoji: "Picapacje, nonaitja caotsa pada aji Israel rico, njite pjiomi watsa njaji jimicapeni nafiocaotsawa. ¹² Jliadawatsa Nonaitjacaotsa pjiomi njaji nocaitelri pia nonaitjaca Elí ipanjeeta isho, lrinita caafete ate cjerreca lriwayacawa. ¹³ Nocaite pia lrisho njoa caotsa jliaji icaite nacunaawa pjiomi njaji lripanjeta naicjaote njaji namatsicana lridawaji icao, ima njatsa nja lrienipe nadee imatsicanaati nanaco jletsa, njite corrí lricaitena yaame carrona. ¹⁴ Naicjaote njaji nanaitjalri nocaite ajádalri sho Elí iipaneta naco, corriotsa nomawadacá carroca namatsicana jiyapaca naino capoantja nosho maaficalri. ¹⁵ Samuel ioshoa imaa jaalretsa lriicao; njite piyompinaco Samuel ia imjeco lri pananoma jliaji Dio iipana. Njite Samuel ifío icaiteca Elí isho lrinaco jliaji lricapalri. ¹⁶ Njite Elí iwana lricjaolre Samuel, lriaco lrisho: ''Pjia nirri Samuel.'' Njite Samuel jiepani: ''Alri njoaji.'' ¹⁷ Elí iaco Samuel isho: ''¿Cocao njaji iacoti wa Minalri icaiterri pisho?'' Notatja piinai caiwi ricota madawatsa nooyana. Dio jirrapiteeta caotsa pjia jorré pja pidawa cadaa nooya pada iacoti Lricaitenda pisho. ¹⁸ Niini Samuel icaite lrisho pjiomi, corri lridawa lrioya pada iacoti. Njite Elí iaco lrisho: ''Wa Minalritsa jliaji caacolri pisho. Lrinaitjenaotsa coancatsa lrioma lrinaitjaca.'' ¹⁹ Njite Samuel itawiña cadana pjatoa, lriinai catsa waminalri njite corrim lricadaa maweena cantja pada iacoti Samuel inoparrotaji naco. ²⁰ Pjiomi njaji Iraelnai, Dan nacjoite atée Berseba nacojle nanjíi pia Dio iniwanandaca jliaji Samuel lrinoparrotá carro Lrisho. ²¹ Njite wa Minalri icatjinataacawa tsenacja Silo ricó, lricadaa tsenacja Samuel icapan, lricaité carro lrisho tsenacja iacoti.