¹ Niini pia ape atsia Ramataim ricó Zofim ricoda, njepaite ricó njaji Efraín poco awacadacawa ricó, lriipitana pia Elcana, Jeroham irrí, Eliu irrí, Tohu irrí, Zuf irrí, efrateotairrí. ² Yaamama pia lrininai; Ana ruipitana shu apama, njite Penina sho apama. Sho Penina rosoca roenipe lrisho, mitsa sho Ana corrin keenipecano. ³ Elcana iamanawa lri yacalré ricjoite oonía icoam, lriinó carró maaficalri lriá carró matsiadalri lrisho jliaji tsolrodaonai Italricanáa Silo ricó. Niini cadana njaji Diu isacerdotenai, njaji iamadade Elí ienipe, Ofni njite Finees tsacja. ⁴ Njite lriocacadanaco jlinaana Elcana iá carró iino maaficalri Diu isho, lrinaitja capisho mana oonia icoam, lría mana Penina isho neepe nacjoite njaji maaficalri lriinojim Diu isho, roijá carró naapiya njaji ruinipe atsianai njite inaipjepe tsacja. ⁵ Mitsa jorré pja mana lriaca Ana isho, ima lripeyopjaca Ana Penina iuya, curricadaanatsa keenipeca lrishono. ⁶ Caishopa rodalrima romeeta manáno caidalritsa ropaimanietá carrono, corricapoa Diu icadaapia roenipewa. ⁷ Oonia icoam, naanu cadanacó Diu iipana ricojle naapiya njaji rokitsiñape, rodarima Penina iometa manano. Caishopa roiyamana sho Ana njite corrim roijaca. ⁸ Njite roinirrí Elcana iaco mana rosho: ''Ana, ¿Coaada piiya? ¿Coada corrim pinjaca? ¿Coada iinonáa picaolre? ¿Capja corrica matsia pjaaca njoa pisho cadantja die pienipe?'' ⁹ Niini apapiena jalredaoca, roinja cam, roirra cam tsacja Silo ricó. Sacerdote Elí iofáa cadaana lripananoma ricó jliaji Diu iipana. ¹⁰ Iinona rocaolre pequiritsa; roiya caiwiricotsa rotatjacadanaco wa MInalri iinai. ¹¹ Rocaite cocacaotsa ronaitja wa Minalri isho, niini rocaite cayoji: ''Pjia tsolrodaonai aimadan Italricana, Picapa cadantja coanca inonaca rocaolre shoaji pishodarro, njite pjimi tsacja rosho; mamawadacatsa pishodarro ioya, piawatsa pisodarru isho roenipewa, njite nocadawatsani wa Minalri isho caidalritsa caaficadanaconi, njite corriotsa coancaojli payoa nja lritsicolre." ¹² Rotatjacadanaco wa Minalri iinai, Elí icapa coanca cananica ronoma. ¹³ Ima caacocano rocaolre ricó. Canani nja ronomaya mitsa corrim pjemica roaco. Niini Elí iwada Ana idewanaca. ¹⁴ Njite Elí iaco rosho: ''¿Coancaojli pjenaotsa yaami pidewanaca? ¡Ajena pirraca jaico tjedaa ianaa capoanjai!" ¹⁵ Mitsa Ana jiepani: ''Corrina no minalri, aapama iinarro cooyolrédarroca njoa. Cotsa iirracadaca jaico tjeda ianaa capoanjai, o yalrakji cantja njua, icaamitsa notatjaca no Minalri iinai caiwirricotsa nocaolre ricjoite.'' ¹⁶ ''Mawaadatsa macadawarroca shoaji pishodarro; mitsa caacoca njoa lrinaco jliaji njotalri nocaolre inaco njite lrinaco jliaji nacjenaatalri mana njoa iicjaote. ¹⁷ Niini Elí jiepano, lriaco rosho: ''Pidiawa pimawadacatsa; Israel Diute watsa inaitja pisho cayoji pitatjá capisho lriinai.'' ¹⁸ Njite Ana iaco: ''Icaamitsa matsiaca nooma picapaca nosho.'' Icaamitsa rodiacawa njite roijaca; njité dalri corriitsa iinonaaca rocapacanaa. ¹⁹ Njite njenico piyompinaco toa naacarro matsiadalri wa Minalri isho, njité dalri nadiawa naapana ricojle Ramá ricó. Niini Elcana imaa lriino Ana iapiya, njite wa Minalri iwaada jliaji rotatjalri pia Lriinai. ²⁰ Njite aima jalredaoca jiapodam, kewedan keenano, njite romotoeta roenipe atsiada. Rocadaa lrripitanawa Samuél: "Ima rotatjandaca wa Minalri iinai." ²¹ Elcana, ipieta tsenacja iacawa lriipaneta iapiya naacarró naa matsiadalri wa Minalri isho maaficalri nainoji sho lrinaitja capisho mana oonia icoam, lricaoñá carró jliaji iacoti lricaiterri pia. ²² Mitsa Ana corrim roawa; roaco roinirri isho: ''Noawatsa nirshe cjerrekenaotsa yaami lrirraca lrinia jliaji kirraitalri; nodeotsa nirseni, lriofáa carroatsa niini caidalritsa wa Minalri ipeyajle.'' ²³ Njite Elcana iaco Ana isho: ''Pinaitja jliaji matsiadalri pja picapa panaitjaca. Piwapa yami lriirraca lrinia jliaji kirraitalri, picadaa wa Minalri carru inaitja cayoji picaitecapisho.'' Niini Ana iofaa iwapa jliaji roenipe a cjerreca yaami lriirraca jlidoa iinia. ²⁴ Shota cadanaco roinia lrioya jliaji roenipe, rodee jliaji iempeti tsoodalritoa, njite rodee apana toro madalrida ooniá dalri iipeca, njite rodee pja yaamana lata icoa matsoca jimiñaca iipetji, rodee pja apjeco buteélla jaico tjedaa ianaa tjacja. Rodeena Diu iipana ricojle Silo ricó. ²⁵ Naino jliaji toro rodenda njite nadee jliaji roenipe Elí icjaolre. ²⁶ Njite roaco cayoji: ''Pjia nu minalri. Cayuji caaficapisho pjia, njoapiatsa shoaji iinarro inolri pia itatja Diu iinai picodapi. ²⁷ Notatja no Minalri iinai jliaji iempeti njite jlimitsa nosho jliaji notatjalri lriinai. ²⁸ Mitsa nocadaa jliaji iempeti no Minalri isho. Caafi cadanaconi no Minalri iyada catsan.'' Njitédalri Elcana itoda lriecoa jiipai nacojle lría carró matsiadalri wa Minalri isho.