1 ¹ Gutpela sindaun stori bilong Solomon pikinini man bilong Devit, king bilong Israel. ² Ol dispela gutpela sindaun stori em bilong lainim na save long gutpela tingting na lainim long kisim gutpela tingting long ol samting i stap hait, ³ olsem na yupela inap long kisim tok orait inap long yupela i stap taim yupela wokim gutpela pasin na i stap stret na i stap wankain. ⁴ Dispela ol gutpela sindaun tu inap long givim gutpela tingting long ol man i nogat gutpela tingting na long givim save na em bai inapim long laik bilong ol yangpela man. ⁵ Larim ol man husait i gat gutpela tingting i harim na kisim bikpela save bilong ol na larim ol man husait inap long lukluk long tingting na skelim i ken kisim long bihainim gutpela rot, ⁶ long kisim tingting long gutpela sindaun na ol toktok na ol tok bilong ol man i gat save na ol tok bokis bilong ol. ⁷ Pasin bilong pret long God Yawe em i stat bilong kisim save, ol bikhet man i save givim baksait long pasin bilong gutpela sindaun taim ol i laik stretim ol. ⁸ Pikinini man bilong mi, harim gut taim papa i skulim yu na noken sakim tok bilong mama bilong yu taim em i laik lainim yu, ⁹ ol bai kamap olsem gutpela bilas long het bilong yu na nekles i raunim nek bilong yu. ¹⁰ Pikinini man bilong mi, sapos ol man bilong mekim sin i grisim yu, yu mas tok nogat long bihainim ol. ¹¹ Sapos ol i tok, "Kam wantaim mipela, yumi slip na weit long kilim ol man, yumi hait na kilim ol man i nogat asua we i nogat as. ¹² Yumi daunim ol taim ol i no dai yet, wankain olsem dai i kisim ol man i nogat sik, mekim ol olsem ol lain husait i pundaun insait long hul. ¹³ Yumi bai painim ol kain kain samting i dia tumas, yumi pulapim haus bilong mipela wantaim ol samting yumi bin stilim long ol arapela lain. ¹⁴ Yupela pilai satu wantaim mipela na yumi i ken skelim olgeta samting namel long yumi yet." ¹⁵ Pikinini man bilong mi, yu noken wokabaut i go daun wantaim ol, yu noken larim lek bilong yu i wokabaut i go long rot bilong ol, ¹⁶ lek bilong ol i ran i go long pasin nogut na hariap tru long kapsaitim blut. ¹⁷ Long wonem em i no gutpela long putim umben taim ol pisin i lukluk i stap. ¹⁸ Dispela ol man i slip na weit long kisim blut bilong ol yet, ol i putim umben bilong kisim laip bilong ol yet. ¹⁹ Dispela em i pasin bilong olgeta man husait i kisim ol samting long rot nogut, pasin bilong kisim ol samting long rot nogut em i rausim laip bilong ol man husait i holim i stap. ²⁰ Gutpela tingting i singaut i stap long bikpela rot, nek bilong em i go antap long ol ples bung, ²¹ long het bilong bikpela rot i gat planti nois em i singaut i go, insait long ol geit bilong taun em i mekim toktok bilong em. ²² "Hamas taim, yupela ol man bilong toktok nambaut, i wok long mekim toktok i no stret? Hamas taim, yupela ol man bilong toktok i go bek bai yupela amamas long mekim tok i go bek na hamas taim, yupela ol bikhet man, yupela bai i no laikim save? ²³ Putim yau gut taim mi stretim yu, mi bai kamautim ol tingting bilong mi i go long yupela na mi bai mekim ol toktok bilong mi i go bilong yupela i ken save. ²⁴ Mi bin singaut na yupela i no laik harim, mi putim han bilong mi i go aut long yupela tasol i no bin gat wanpela man i stap long kisim. ²⁵ Tasol yupela i bin sakim olgeta tok mi bin tokim yupela na i no bihainim tok bilong mi taim mi stretim yupela. ²⁶ Mi bai lap long yupela taim bikpela hevi i kisim yupela na mi bai toktok bek long yupela taim bikpela hevi kam, ²⁷ taim bikpela pret kam olsem bikpela win na bagarap i karamapim yupela olsem raunwin na taim pen o sore na pen long bodi o tingting kam antap long yu. ²⁸ Na ol bai i singaut long mi na mi no inap bekim ol, ol bai laikim tru long kolim mi tasol ol i no inap painim mi. ²⁹ Long wanem ol i no gat gutpela tingting long save na ol i no skelim na painim rot bilong pret long God Yawe, ³⁰ ol i no inap bihainim toktok bilong mi na ol i no laikim mi stretim ol. ³¹ Ol bai kaikai frut bilong pasin bilong ol yet na wantaim frut ol yet bung na kamapim long en ol bai i pulap. ³² Long wonem ol man i no save tok stret bai dai taim ol givim baksait na ol pasin bilong nogat laikim bilong ol bikhet man bai i bagarapim ol. ³³ Tasol husait ol man i harim tok bilong mi bai i stap gut na kisim malolo gut na ol i no inap pret long kisim bararap."