2 ¹ Long namba 7 mun long dei 21 bilong dispela mun, tok bilong God Yawe i kam long maus bilong Profet Hagai na i tok, ² "Tokim gavana bilong Juda olsem, Serubabel pikinini man bilong Sealtiel na long bik pris Josua pikinini man bilong Jehosadak na long ol manmeri i holim bilip na stap yet. Askim ol, ³ 'Husat i stap yet namel long yupela i lukim dispela haus bilong God i stap bipo i gutpela tumas? Yupela i lukim ol dispela samting nau i olsem wanem? Em i olsem samting nating long ai bilong yupela a? ⁴ Tasol nau yu mas sanap strong Serubabel! God Yawe i tokaut pinis olsem na yu mas sanap strong, Josua bikpris na pkinini man bilong Jehosadak, yupela mas sanap strong yupela olgeta manmeri i stap long dispela ples! God Yawe i tokaut strong olsem na wok strong, long wanem mi stap wantaim yupela! God Yawe i gat olgeta strong i tokaut pinis olsem. ⁵ Dispela em i kontrak mi mekim pastaim wantaim yupela taim mi kisim yupela i kam aut long Isip na Spirit bilong mi i stap yet long yupela. Noken pret! ⁶ Long wanem God Yawe i gat olgeta strong i mekim dispela tok olsem, long liklik taim bihainim bai mi seksekim heven na graun wantaim solwara na olgeta hap graun! ⁷ Mi bai seksekim olgeta kantri na olgeta kantri bai i bringim ol samting i gat bikpela pei i kam long mi na bai mi pulimapim dispela haus wantaim bikpela strong bilong mi, God Yawe i gat olgeta strong i tok. ⁸ Olgeta silva na gol i bilong mi tasol! God Yawe i gat olgeta strong i tokaut olsem. ⁹ Na bikpela strong long dispela haus bilong bikpela bai i bikpela moa long taim i kam bihain na i winim wanem i bin kamap pastaim, God Yawe i gat olgeta strong i tok mi bai givim bel isi insait long dispela haus bilong mi tasol! Dispela em i tok bilong God Yawe i gat olgeta strong." ¹⁰ Long dei 24 bilong namba 9 mun, long namba tu yia bilong Darius i stap king, tok bilong God Yawe i kam long profet Hagai na i tok, ¹¹ "God Yawe i gat olgeta strong i tok olsem; Askim ol pris long ol tok i stap long lo na tok, ¹² 'Sapos wanpela man i kisim mit bilong abus ol i makim pinis bilong putim long haus bilong God Yawe na haitim insait long klos em i raunim long en na hap bilong dispela klos i tatsim bret o sup, wain o wel, o wanem kain ol kaikai, dispela inap kamap klin a?'" Na ol pris i bekim na i tok, "Nogat." ¹³ Na bihain Hagai i tok, "Sapos wanpela man i doti long wanem ol daiman i tatsim wanpela bilong dispela ol samting, dispela inap mekim ol i kamap doti a?" Na ol pris i bekim na i tok, "Yes, ol i kamap doti." ¹⁴ Olsem na Hagai i bekim na i tok, "Olsem tasol long ol dispela manmeri na dispela kantri i stap klostu long mi! God Yawe i gat olgeta strong i tokaut long tingting na pasin bilong ol man i mekim ofa bilong ol long alta tu. Wanem kain ol ofa ol i mekim long mi i doti! ¹⁵ Olsem na nau, tingim insait long tingting bilong yupela long bipo tru i kam inap long nau. Taim yupela i no putim ston antap long ston long stat na wokim haus bilong God Yawe yet, ¹⁶ em i stap olsem wanem pastaim? Taim yupela i kam kamap long ples ol i bungim 20 wit, long dispela hap i gat 10 tasol i stap; na taim yupela kam bek long ples bilong krungutim wain na pulimapim wain inap samting olsem 50 mak bilong wain, i gat samting olsem 20 mak tasol. ¹⁷ Mi bagarapim yupela pinis long olgeta wok yupela i mekim wantaim binatang na waitpela samting olsem ais i gro antap long ol, tasol yupela i no tanim na kam long mi, God Yawe i tokaut olsem. ¹⁸ Tingim long dispela dei na i go olsem, long dei 24 bilong namba 9 mun, long taim ol i stat long sanapim haus bilong God Yawe. Tingim gut! ¹⁹ I gat sampela sid i stap yet long haus bilong bungim kaikai a? Ol wain, ol diwai fik, ol pomagranet na ol diwai oliv olgeta i no karim kaikai! Tasol long dispela taim nau bai mi mekim gut long yupela!" ²⁰ Na bihain God Yawe i salim tok i kam namba tu taim long Hagai long namba 24 dei long dispela mun na i tok, ²¹ "Tokim Serubabel dispela gavana bilong Juda na tokim em olsem, 'Mi bai seksekim heven wantaim dispela graun. ²² Long Mi bai rausim sia king bilong ol king bilong ol kantri na bagarapim strong bilong ol manmeri bilong dispela ol kantri! Mi bai rausim ol karis na ol man i save sindaun long karis bai kisim bagarap, ol hos na man bilong sindaun long ol hos bai pundaun na kisim bagarap long wanem bai ol i kilim wanwok bilong ol yet. ²³ Long dispela taim stret God Yawe i gat olgeta strong i tokaut olsem, mi bai kisim yu Serubabel pikinini man bilong Sealtiel olsem wokman bilong mi, God Yawe yet i tokaut olsem. Mi bai mekim yu i kamap olsem ring long pinga bilong mi, long wanem mi makim yu pinis! Dispela em i tok bilong God Yawe i gat olgeta strong!'"