4 ¹ Nau sampela ol birua bilong ol lain Juda na ol lain Benjamin ol i harim olsem ol manmeri ol i bin go kalabus ol i kam i stap na wokim tempel bilong God Yawe, God bilong ol Israel. ² Olsem na ol i go toktok wantaim Serubabel na ol hetman bilong ol tumbuna lain famili. Ol i tok olsem long ol, ''Larim mipela i wok wantaim yupela, mipela i wan kain olsem yupela, mipela i laik i go klostu long God bilong yupela, bipo mipela i bin mekim ol ofa long em long taim Esahadon king bilong Asiria i bin kisim mipela kam long dispela ples.'' ³ Tasol Serubabel, Jesua na ol hetman bilong ol tumbuna lain famili ol i tok olsem, ''Mipela tasol mas wokim haus bilong God bilong mipela, i no yupela, long wanem em mipela tasol bai i wokim haus bilong God Yawe, God bilong mipela ol Israel, olsem King Sairus bilong Persia i bin tokim mipela.'' ⁴ Olsem na ol manmeri bilong dispela hap mekim pasin birua long ol lain Juda na ol Juda i pret long wokim haus, ⁵ Ol i givim gris moni long ol kaunsol long givim hevi na tok nogat long ol Juda long wokim haus. Ol i givim planti hevi long ol Juda long taim Sairus i stap king i go inap em i dai na i go moa yet long taim bilong Darius king bilong ol Persia. ⁶ Na taim Ahasuerus i stat long wok olsem king ol birua i raitim wanpela pas long em na sutim tok long ol manmeri bilong Juda na ol manmeri bilong Jerusalem. ⁷ Taim Artasekses i stap king, Bislam, Mitredat, Tabel na ol wantok bilong ol i raitim wanpela pas long Artasekses. Ol i bin raitim pas long tokples Aramaik na ol i tanim. ⁸ Rehum ofisa bilong ol ami na Simsai man bilong raitim ol pas tupela i raitim dispela pas olsem long Artasekses long wanem ol samting i wok long kamap long Jerusalem. ⁹ Orait Rehum, Simsai na ol pren bilong ol, em ol jas na ol arapela ol ofisa long gavaman, ol man bilong Persia, ol man bilong Erek na Babilon na ol man bilong Susa, em ol Elam, ol i raitim pas, ¹⁰ na ol manmeri husait Asupanipal, strongpela na gutpela king i bin rausim ol kam stap long Samaria wantaim ol arapela manmeri bilong Provins Hapsait long Bikpela Wara i kam bung wantaim ol. ¹¹ Dispela em i wan kain tok i stap long pas ol i bin salim long Artasekses, ''Ol wokman bilong yu, ol man bilong Provins Hapsait long Bikpela Wara, i raitim olsem, ¹² Larim king i mas save olsem ol Juda husait ol i lusim yu na kam i stap long Jerusalem ol i no laik wokbung wantaim mipela na ol i sakim tok na ol i laik wokim dispela biktaun bilong ol bikhet manmeri. Ol i wokim pinis ol banis na ol i stretim pinis ol graun bilong sanapim ol haus. ¹³ Nau larim king i mas save sapos ol i wokim dispela biktaun na ol i wokim banis pinis, ol manmeri bai ol i no inap givim ol samting na ol takis, ol bai i givim ol hevi na bagarap tasol long ol king. ¹⁴ Tru tumas mipela i bin kisim ol gutpela helpim i kam long haus bilong king, mipela bai i sem long lukim ol samting nogut i kamap long king. Em i olsem na mipela i wok long toksave long king, ¹⁵ long mekim wok long painim ol buk long haus bilong papa bilong yu na long strongim ol tok olsem dispela em biktaun bilong ol bikhet manmeri em ol bai i bagarapim ol king na ol provins. Em i bin kamapim planti hevi long ol king na long ol provins. Em i as ples tru bilong ol bikhet manmeri long bipo yet, Long dispela as tasol dispela biktaun ol i bin bagarapim olgeta. ¹⁶ Mipela i wok long toksave long king olsem sapos ol i wokim dispela biktaun na banis, orait long Provins Hapsait Long Bikpela Wara bai i nogat wanpela samting bilong yu bai i stap.'' ¹⁷ Olsem na king i bekim pas i go long Rehum na Simsai na ol pren bilong ol long Samaria na ol arapela ol i stap long Provins Hapsait long Wara. Long pas em i tok olsem, ''Larim bel isi i stap long yupela ¹⁸ Pas yu bin salim long mi ol i tanim tok na ol i ritim long mi. ¹⁹ Olsem na mi bin tokim ol long painim aut na ol i painim olsem long sampela yia i go pinis ol i bin bung na kros pait wantaim ol king. ²⁰ Ol strongpela king ol i bin bosim Jerusalem na olgeta samting long Provins Hapsait long Wara ol i bin stap long strongpela han bilong ol. Ol samting na ol takis ol manmeri ol i bin givim i go long ol king. ²¹ Nau, yu mas pasim tok wantaim ol dispela man long pasim ol wok na ol i noken wokim dispela biktaun inap mi tok orait. ²² Yu mas was gut na yu noken lusim tingting. Bilong wanem yu no lukautim gut na larim dispela hevi i kamap na planti samting bilong king i bagarap na i lus? ²³ Taim ol i ritim lo bilong King Atasiskis long ai bilong Rehum, Simsai na ol pren bilong ol i harim, ol i go hariap long Jerusalem na tok strong long ol Juda long noken wok moa long haus. ²⁴ Olsem na ol wok long haus bilong God long Jerusalem ol pasim i stap i go inap long namba tu yia bilong king Darius bilong Persia.